Lenaldo Courtar, di LC Enterprises ta trahando riba tereno di buskeda y rescate, tabata un di e participantenan den e charla organisa pa Fundacion Alzheimer den cuadro di celebracion di Siman di Cinta Teal. E luna aki ta conscientisa ciudadanonan riba e malesa di Alzheimer. Un malesa riba cual su maneho ta laga di desea, segun e presidente di e Fundacion Melva Yanez a bisa den un reciente conferencia di prensa.
Courtar a haya e charla aki interesante pa participa den dje, mirando cu e ta activo desde aña 1995 cu e programa di “Search & Rescue” na Sint Eustatius. Participando den e evento aki ta dun’e e oportunidad pa comparti e informacion ricibi cu mas hende na su pais.
Aunke cu Statia ta un isla basta chikito, nan tambe ta confronta caso di hendenan perdi. Na november ultimo mes tabatin e caso di un pareha cu a pasa 17 ora perdi prome cu a yega na nan.
Pero algun di e problemanan cu nan ta confronta cu ne ta cu no tin e hermentnan disponibel pero tampoco e finansa necesario pa e tipo di trabounan cu tin biaha por ta basta costoso.
Polis ta traha cu nan reglanan pero nan di Search & Rescue ta traha cu otro regla y pa nan reaccion rapido y inmediato ta hopi importante. For di e prome yamada caba nan ta sali busca, pasobra “nos trabou ta pa salba bida”. El a bisa cu otro entidadnan, manera Polis, ta actua despues pero nan organisacion mester sali y busca for di momento cu e prome yamada drenta.
Loke cu el a siña durante e sesion di e orador Robert Caster (experto den buskeda y rescate), tabata con pa acumula y analisa data. El a siña riba kico mester wak of busca pa yega mas lihe na e persona cu ta busca y haci e rescate na tempo.
