Den e periodo ku a pasa, polis a risibí vários notifikashon tokante outonan mal stashoná den e área di ‘centrumgebied’ i bisendario, na sitionan na kua no ta permití pa stashoná. Esaki a resulta di ta e kaso for di diferente notifikashon ku a drenta via e ‘meldkamer’ sentral i serka e polis di bario di Playa. Stashoná riba asera òf na sitionan ku no ta destiná pa stashoná vehíkulo ta prohibí I ta kousa molèster i situashonnan peligroso pa otro usuarionan di tráfiko. Esaki por hasié difísil òf asta imposibel pa pasada di peaton òf vehíkulo, e ta stroba bista di otro shofùrnan, òf krea otro situashonnan peligroso.
Pa atendé ku e problema aki, a tene un kòntròl di tráfiko grandi den oranan di mainta riba djárason 25 di sèptèmber, dirigí riba outonan mal stashoná. Asta si doñonan kier a kita nan vehíkulo na e momentu ei, tòg nan a haña un but. Kran a tou sinku vehíkulo hiba warda di polis i a duna un total di 28 but.
A duna but pa e siguiente infrakshonnan:
- 21x pa stashoná robes;
- 3x pa manehá sin faha di seguridat bistí;
- 2x pa manehá sin reibeweis bálido;
- 1x pa uzo de telefòn selular tras di stür;
- 1x pa maneha sin seguro bálido.
Durante di e akshon, a saka un potrèt di e lugá di parker nobo na Brion Kazèrne (wak potrèt 1), situá patras di warda di polis na Playa, ku ta aksesibel pa públiko for di yüni 2024. Ounke tabatin alrededor di 30 lugá di stashoná disponibel na e momentu ei durante di e kòntròl, hopi shofùr tòg a skohe pa stashoná nan vehíkulo di forma ilegal. For di e lugá di stashoná outo aki, por alkansá e área di ‘centrumgebied’ i Kaya Grandi na pia denter di un minüt.
Durante oranan di mainta riba djaweps 26 di sèptèmber tambe a tene un kòntròl den ‘centrumgebied’ i a duna 6 shofùr un but pa stashoná robes di kua kran a tou dos outo hiba warda di polis.
Kuerpo Polisial Hulanda Karibense (KPCN) ta atvertí ku lo tou vehíkulonan mal stashoná den e área di ‘centrumgebied’ i bisendario na sitionan ku no ta permití. Den e periodo benidero, polis lo sigui kontrolá regularmente i di forma estrikto. Personanan ku kometé violashon por haña un but di te ku $85, i por tou e vehíkulo mal stashoná. Gastunan di tou ta bini riba kuenta di e doño di e vehíkulo.
Tuma bo responsabilidat komo usuario di karetera i kontribuí na un tráfiko sigur.
