“Costo di bida na Aruba ta carisimo, nos ta core kita 20 Dollar for di e turista pa bay inverti den un RWZI cu ta un responsabilidad di esnan cu ta haci uzo di dje, no di e turista” lider nobo di PPA ta declara na prensa.
Otmar Oduber, kende diaranson anochi a anuncia oficialmente cu a yega na un acuerdo cu PPA pa e lidera e partido oranje, ta puntra su mes dicon no ta inveri e placa aki den bay definitivamente riba energia di gas. Por scucha ta papia riba diferente forma pa produci coriente mientras cu esun proba ta esun di gas. Si dicidi di cambia pa gas, e lo por trece un reduccion di 20 pa 30% pa comunidad di Aruba.
Igualmente el a indica cu ta bay reduci gasto di gobierno cu 12% den e proximo gobernacion, cual ta significa 140 miyon. Probablemente e no lo wordo logra den e prome aña, pero e decisionnan tin cu wordo tuma pa den e transcurso di 4 aña reduci esaki.
“E placa aki tin cu bay pa nos grandinan, pa nos pensionadonan, pa nos baha nan AZV, pa nos baha nan AOV cu nan ta pagando na e momentonan aki. Tambe pa duna AZV e placa pa nan por busca remedinan cu a wordo kita for di nos pensionadonan y tambe pa nos por duna un entrada digno pa nan por tin un biba corecto na Aruba”, Otmar Oduber a declara
Secretario General di PPA, Otmar Oduber: Nos lo duna atencion na reduccion di costo di bida y gastonan di gobierno
