Miss Universe Bonaire 2024, Ruby Pouchet,
orguyosamente a representá Boneiru durante New York Fashion Week, un di e
eventonan di mas importante den mundu di moda, kaminda el a marka un logro
signifikante pa Boneiru. Ruby su presentashon ta un parti di su preparashon pa Boneiru
su regreso fuerte riba pasarela di Miss Universe despues di un ousensia di 25 aña, i e ta
desidido pa yena su isla ku orguyo.
Den luna di novèmber Ruby ta bai partisipá na e di 73 sertámen di Miss Universe na Mexico
City. E show preliminar ta tuma lugá dia 14 di novèmber i e koronashon final ta dia 16 di
novèmber. Siman pasá Ruby a hasi su debut riba pasarela durante New York Fashion
Week pa e famoso diseñadó Sherri Hill, ku ta mundialmente konosí pa su trahenan di alta
kostura. Ruby a partisipá tambe na un fotoshoot di moda ku e fotógrafo renombrá Fadil
Berisha. Por a mira obranan di Berisha den Vogue i InStyle i el a traha huntu ku markanan
tòp manera Rolex, Bulgari i Estée Lauder. Despues di New York Ruby lo kontinuá ku su
preparashonnan ekstenso na Venezuela, kaminda e ta bai enfoká riba refinamentu di su
abilidatnan riba tereno di fitness, pasarela i entrevista.
E biahe akí lo no tabata posibel sin sosten di nos spònsernan, nos partnernan i henter nos
komunidat. Nos ta ekstendé nos mas profundo gratitut na Tourism Corporation Bonaire,
Entidat Públiko Boneiru, BonTravel, Van der Valk Plaza, Sebastian’s, Web, Fundashon
Wega di Number Boneiru, Massive Production, Blendr, Pier Dos, Hype, Changes, Wilca,
Best Buy Duty Free, Chicas Strong, Essence, Bon Laser, Patricia Silvera Spa i Energia TV.
Awor ku Ruby ta yegando mas serka di e esenario di Miss Universe, nos ta invitá nos
komunidat pa sigui dun’é sosten riba e biahe fantástiko akí pa mustra kon fuerte nos ta
para huntu. Pa mas informashon òf pa bira spònser, bo por tuma kontakto ku Miss
Universe Bonaire Organization. Laga nos huntu apoyá Ruby, miéntras e ta representando
Boneiru ku elegansia, determinashon i pashon!
Boneiru ta bria na New York Fashion Week ku Ruby Pouchet den preparashon pa Miss Universe
