Manera cu ya ta conoci for di varios luna caba Departamento di Agricultura, Cria y
Pesca Santa Rosa hunto cu Living Soil Aruba y ministerio di Transporte, Integridad,
Naturalesa y Adulto Mayor a efectua e proyecto di Agroforesteria Sintropico na
varios scol cu a haya e nomber crioyo di “Hardin di Alimentacion”. Un total di 12
scol a ricibi e proyecto aki. Na tur scol e reto di awa ta keda hunga un rol importante.
Sea debi na falta di sistema pa colecta esaki of tambe pa falta di bari of bakinan pa
colecta e awa di airco of yobida. Berdad ta tambe cu ta hasi uso di awa di WEB NV
pa muha nan cultivo. E meta ta keda si pa purba na mantene e uzo di awa di WEB NV
abou y ora cu di berdad mester.
Practicamente tur scol y localnan ta disponi di airco. Ta simplemente mester
wordo adapta pa por colecta e awa aki. Locual ta e colectamento di awasero. tambe
tin su retonan pero no imposibel pa por realisa.
Durante cu e proyecto di Agro Forestry tabata andando varios docente y
cabesantenan involvi tabata boga pa un of otro ayudo pa haya sea bari of tankinan
blanco di 1000ltr yama tambe como IBC Container (Intermediate Bulk Container) pa
por cuminsa na colecta awa. Santa Rosa cu ta para pa e Proyecto aki a duna di conoce
den e periodo ey cu na momento di tin e tankinan di 1000ltr aki disponible nos lo
informa e scolnan. Claro cu nos di Santa Rosa no ta disponi directamente di e
tankinan aki pero danki na WEB Aruba NV ta haya algun tanki cu nos por facilita e
scolnan pa nan Proyecto. Cumpliendo cu palabracionan y sigur na un mihor forma pa
cada scol por colecta awa pa nan “Hofi di Alimentacion”.
Tankinan di 1000ltr a keda entrega na algun scol. Pakico algun scol pa motibo
cu segun cu nos ta ricibi esakinan for di WEB Aruba NV y ta depende di e cantidad
cu nos ta ricibi nos por facilita e scolnan cu dos tanki. Dado caso lo mester bai tuma
un tempo atrobe te ora cu tin tanki disponibel y cu nos ricibinan for di WEB Aruba
NV nos lo por continua cu e otro scolnan cu kisas falta ainda.
Scolnan cu a ricibi e tankinan aki pa cu nan Proyecto di “Hardin di
Alimentacion ta Puis X School, Sint Paulus School, Colegio Santa Filomena, IPA
(Instituto Pedagogico Arubano) y Maria College. Tur e scolnan aki a ricibi dos tanki
for di Deparatamento di Agricultura, Cria y Pesca Santa Rosa y WEB Aruba NV. Nos
ta gradici inmensamente WEB Aruba NV pa facilita e tankinan aki cu nos por a
reparti pa e scolnan manera menciona. Nos ta hopi sigur cu cada scol lo sa di hasi bon
uso di e tankinan aki pa nan proyecto.
