Fundacion Go Cultura ta entusiasma y contento pa anuncia e celebracion di su di 7 aniversario.
A traves di e añanan cu a pasa, Go Cultura a bira un simbolo di preservacion y promocion
cultural, empoderamento artistico y innovacion creativo na Aruba, mientras cu e ta sali na
defensa di e Industrianan Cultural y Creativo di nos isla. Conscientisando di e potencial increibel
di e industrianan aki pa transformacion social y diversificacion economico.
Parando keto na e logro importante aki, nos fundacion ta refleha cu un gratitud inmenso riba e
sosten cu nos a ricibi for di comunidad Arubano, organisacionnan local y internacional, y
individuonan cu nan contribucionnan ta esencial pa nos trayectoria.
Go Cultura a cuminsa como un proyecto visionario, cu e mision pa engrandece e sector cultural
y creativo di nos isla, specificamente pa formalisa y desaroya e Industrianan Cultural y Creativo
di Aruba.
Loke a cuminsa como un soño, den poco tempo a bira un organisacion vibrante dedica na pone
cultura y creatividad den e curason di e desaroyo sostenibel di Aruba.
E mision di e fundacion ta hopi cla: empodera artistnan y sernan creativo local, duna nan
plataforma pa nan expresa y conscientisa di e potencial di e sectornan cultural y creativo pa nan
contribui na transformacion social y diversificacion economico.
Logro y proyectonan:
Durante e 7 añanan aki, Go Cultura no a solamente inspira orguyo pa e herencia cultural di
Aruba, sino tambe a entrega resultadonan tangibel. E fundacion a organisa tayernan pa
artistanan y sernan creativo local, creando oportunidadnan pa crecemento personal y
profesional. Ademas di esaki, Go Cultura tabata anfitrion pa cuater luna consecutivo di
eventonan di networking tur fin di siman, uniendo henter un comunidad dinamico di artistanan
y sernan creativo pa nan colabora, conecta y intercambia idea.
Logronan sobresaliente ta inclui:
– Conciertonan di recaudacion di fondo, uniendo nos comunidad pa celebra cultura mientras ta
sostene y apoya proyectonan creativo.
– Programanan di television y documentarionan cu ta pone e diversidad cultural di Aruba y nos
historia den spotlight.
– Foro Cultural, un plataforma durante e temporada di campaña di 2021, caminda politiconan a
comparti nan visionnan pa e siguiente periodo gubernamental. Presente na esaki tabatin
artistanan y sernan creativo, cu nan preocupacionnan y idea pa e futuro di e sectornan cultural
y creativo di Aruba.
-Premio Nacional Crioyo di Oro, un evento anual cu ta honra y celebra e logronan mas
sobresaliente den e sector artistico y cultural local, specificamente den e sector di “Arte di
Tarima”.
– Eventonan pa rindi homenahe na icononan local, pa sigura cu e herencia y legado cultural di
Aruba keda bibo y wordo celebra pa e generacionnan binidero.
– Paranda Nacional di Dande: Go Cultura a introduci e proyecto innovativo aki pa preserva e
tradicion di Dande di Aruba. E Paranda Nacional di Dande a pone musiconan y cantantenan riba
trailer, permitiendo nan pasa den diferente bario y districto, treciendo e alegria di Dande y
deseonan di bendicion, paz, felicidad y prosperidad na un publico mas amplio. E formato nobo
aki a haci e experiencia cultural mas accesibel y a haya gran sosten di comunidad, yudando pa
mantene e tradicion bibo mientras ta adapt’e pa esnan di e generacion mas hoben. Haciendo
nan curioso y entusiasma cu e tradicion musical aki.
E proyectonan aki ta subraya e compromiso firme di Go Cultura pa "walk the talk" y pa sostene
y fortifica e sector cultural y creativo di Aruba. A traves di un acercamento colaborativo y
enfoca riba comunidad, e fundacion ta comprometi na involucra artistanan, sernan creativo y
entidadnan local pa contribui na desaroyo social y cultural di nos isla na un manera significativo.
Un directiva nobo pa futuro
Banda di e celebracion di su di 7 aniversario, Go Cultura ta orguyoso pa anuncia su directiva
nobo. Liderando e organisacion pa su siguiente capitulo ta:
– Arthur Loefstok, presidente y co-fundador
– Edjean Semeleer, vice-presidente, tesorero y co-fundador
– Amy Longott-Richards, miembro di directiva y consehero
– Thaïs Franken, miembro di directiva y consehero
– Shirenne Quandt, miembro di directiva
Siguiendo padilanti cu orguyo y gratitud
E exito di Go Cultura lo no ta posibel sin e sosten constante di e comunidad Arubano.
Nos fundacion ta extende nos sincero gradicimento na entidatnan local, companianan,
organisacionnan y individuonan cu a colabora cu nos durante e añanan aki. Boso
contribucionnan ta instrumental pa permiti Fundacion Go Cultura sostene e Industrianan
Cultural y Creativo di Aruba y haci e esfuerso pa demostra e potencial increibel cu e sectornan
aki ta posee. P’esey mes nos lo celebra e aniversario aki durante nos proximo evento grandioso
cu ta e conferencia “CreActivo” cu lo tuma lugar dianan 8 y 9 di october den Renaissance
Convention Center.
Mientras nos ta celebra e logro importante aki, nos ta keda enfoca riba futuro cu hopi
entusiasmo, comprometi pa sigui conscientisa y apoya e sector cultural y creativo pa beneficio
di tur habitante di Aruba. Hunto, nos por sigui cultiva un cultura vibrante y dinamico cu ta
enrikece tanto e alma como e economia di nos isla. Masha danki un bes mas pa e apoyo!
Pa mas informacion di nos fundacion, proyectonan actual, of pa sa mas di e directiva nobo y
henter nos ekipo, por bishita GoCultura.org
