E siman aki, despues cu a bira conoci cu Misha Raymond lo no sostene mr. Edgard Vrolijk como presidente, mesora a yama un reunion den Cocolishi. Ey a atende Evelyn Wever-Croes, Ursell Arends, Misha Raymond y Edgard Vrolijk. A purba di papia cu e politico pero cabes ta duro y no ta cumpli cu palabracionnan haci. Tambe diasabra anochi tabatin un reunion di urgencia na Dakota Shopping Paradijs unda cu partido Raiz a yama mirando e problemanan cu tin sinembargo tampoco no a logra.
Di otro banda por a tuma nota di diferente reaccion politico di diferente partido den oposicion, principalmente esunnan cu ta papia di ta politica nobo den parlamento, expresionnan sin pia sin cabes.
E postura politico aki ta daña nos Pais y Lider di Accion 21 ta un di e politiconan conoci pa su populismo, pero ora bay mira kico ta realidad of no ta laga hopi di desea. Pero ya caba a laba mente di un comunidad pa maniobra riba un berdad y realidad cu e pueblo lo mester bay confronta despues.
Dicon segun Lider di Accion 21 Miguel Mansur Presidente di Parlamento no ta apto ? Dicon tipo di politica asina? Kico kier logra cu tipo di actuacionnan aki? Poder? Popularidad? Pero na mes momento cu ora Presidente di Parlamento hala nan atencion di cosnan robes y fout cu ta keda haci, aki ta caminda cu e rabo ta krul y sigur e ora e Presidente di Parlamento no ta esun mas gusta
Kico ta e unico motibo cu no ta gusta Edgard Vrolijk como Presidente di Parlamento ? Paso e ta para pa norma y balor ? Paso e ta para pa regla den cas ? Paso e ta kere e ta den politica pa su pueblo y no pa su mes ? Paso e kier un comunidad sano y no venena e mente di un mucha of hoben riba su sexo, pero kier pa e mucha keda mucha ? paso nan no a haya nan kier ?
Pa pueblo por compronde mas miho “ningun mucha malcria no lo gusta un ranca di horea di nan mayor, aunke nan ta robes kier hunga y maniobra cu nan no ta fout”. Aki ta hopi biaha e conocemento di pueblo ta importante.
Un Presidente di Parlamento su tarea ta pa cosnan cana segun regla y ordo den parlamento y na momento cu desvia di esaki su tarea di esaki ta pa trek esaki bek debidamente y ta bisto cu hopi di e politiconan malcria den parlamento no ta gusta e parti aki. Ta lamenta cu lider di fraccion Accion 21 na un comienso a mustra di ta un politico cu lo kier haci otro politica pa Aruba , pero ta mira e mentalidad y direccion completamente robes.
