Nos sa cu Tristeza ta bay man den man cu Alegria. Nos sa tambe, cu nos tur tin cu crusa e brug
ey ora e bati na nos porta. Pero esey no ta kita cu e ta hasi menos dolor mental y emocional pa
esnan cu ta keda atras. Hopi ta esnan cu a tuma despedida di amigo Juani Schwengle, e ruman
homber di nos bisinya, nos lieve buurvrouw Mena y Tio di Randall Wever. Tawata un bunita
sirbishi cu bunita cantamento di Max Hassell acompanja pa su guitarra y despues tambe e
simpatico y bunita Lila Richardson a canta y guia e ceremonia musical cu su bunita curason y su
bos maraviyoso angelical. Tur cu a tene un speech tocante e bida yen activo y alegre di Juani a
comparti cosnan hopi bunita di e dushi hende cabayero cu Juani tawata. Juani tawata un “movie
star” rubiano, banda di tawata un bon meneer di scol e tawata un tremendo actor semper alegre y
gradicido pa bida. Nos ta desea su esposa Oddy , yuinan, nietonan, rumannan y demas famianan
Swhengle y Croes hopi consuelo y amor. Juani awor mas serca di mente, alma y curason. E parti
di Alegria di awe, ta wordo dedica na e bunita expo “E lens di mi wowonan” di un shon di
hende, un cabayero dinamico y semper inspira tras di su camera di saca potret of filma, Leo
Vrolijk, cu ta e motor y curason tras di e bunita expo aki di 235 potret, un expo pa engrandece
Dia di Prensa cu a wordo realisa atrobe cu yudanza financiero di RBC bank. Sr. Pierre Rafini di
RBC a dirigi palabra y felicita Leo Vrolijk y a expresa con contento nan ta, pa por a patrocina
un biaha mas e expo exitoso aki, dedica na e periodisnanan fotografo profesional Farrah
Boekhoudt, cu 25 anja den prensa, na Marianelly Berry y na Hubert de Cuba. Premio Djiespies
a bay pa Joshua Bryson cu su 15 anjanan den prensa sacando potret. Julissa Boekhoudt a fungi
como e maestra di ceremonia y a hasi esaki den un forma formidabel den bon papiamento, bon
articulacion. Farrah Boekhoudt , propietario di su compania den media EANEWS on line, E
arubiano news, a comparti di su bunita curason su viahe di ups and downs den e mundo di
prensa, con duro ela traha, con e la logra tur su metanan y ta un di e prome hende muhenan cu a
yega asina leu profesionalmente . Su bunita luz, su bunita curason a dirigi e hende muhe
empodera aki . Manera amigo di Dakota tur dia, Victor “Toko” Winklaar a bisa, Farrah ta un
“self made woman”. EANews ta den varios idioma y por wak e noticianan na nos islanan abc y
tambe na Saba, St.Maarten y St. Eustatius como tambe na Hulanda. (EANews bayendo pa nan di
6 anja di existencia dia 17 di September venidero). Pabien na e tres personanan cu a hanja un
reconocimento: Marianelly Berry, Hubert de Cuba y specialmente na Farrah Boekhoudt. E expo
“E lens di mi wowonan” tin potret tambe dedica na Fundacion Rancho pa cu 200 anja di
Oranjestad y na Biblioteca Nacional cu nan 75 anja di existencia. Un joya di exposicion cu hopi
“action pictures” y mas. E expo aki ta habri pa publico pa mas o menos un luna asina, si nos no
ta hera. Tawata un bunita anochi di apertura , na unda por a topa cu varios amigonan den prensa,
e.o. Famous Diaz y varios mas cu , ach, nos ta corda cara y curason, pero no tur e nombernan.
Lady Ruth ta di e tempo di Toko Winklaar, Djiespies, Django, Jos van der Schoot, Don Carlos
Kelkboom entre e grandinan y no ta corda nomber di e hobennan trahando den prensa awendia.
Ach si, Trevorr y Charlene di VIP TV Radio. Ivan Kelie Jr. Y Siomara na Tele Aruba di Nos
Mainta tambe. Y mas cu claro, amigo Nilton Lacle y Aureen Werleman di Diario. Nos tambe ta
felicita Leo Vrolijk y tur cu a yuda cu e setup di e expo. Ora bo ta keiro atardi, pasa drop in na
BNA den G. Madurostraat y admira e obra di arte di saca potret. Danki pa lesa nos relato y pasa
un bon y dushi dia yen di sabiduria den nos alegria ! Un “bearhug” di Ruthy pa boso tur !
