E cambio di nomber ta resultado di nos evolucion y nos bista riba futuro. E nomber nobo ta
refleha miho ken nos ta awor y unda nos kier yega.
Aparte di e tempo cu nos a tuma internamente pa refleha y celebra nos 70-aniversario, e
decision aki a haya e atencion y dedicacion necesario. Nos no a wak solamente nos mision pa
futuro, pero nos a para keto tambe na origen di e fondo.
Dia 7 di augustus 1953 Prins Bernhard a firma e acta di fundacion di e fondo na Corsou.
Cu esaki el a debolbe e fondo na su tera natal Caribeño. Durante segundo guera mundial e
pueblonan di Caribe Hulandes a colecta placa cu a contribui en grande na e Spitfire Fund,
destina pa compra di material di guera pa yuda Hulanda. Despues di guera, e placa cu a sobra
a sirbi como base pa comienso di un historia bunita di sosten continuo pa arte y cultura, tanto
na Hulanda como na Caribe Hulandes.
Het Cultuurfonds Caribisch Gebied ta dedica su mes na desaroyo di cultura y preservacion di
e identidad unico di Aruba, Boneiro, Corsou, Sint Maarten, Sint Eustatius y Saba. Nos ta
duna sosten na iniciativanan cu ta pone e cultura y naturalesa Caribeño den centro di
atencion, tanto localmente como mundialmente. Nos logo nobo, cu su solo radiante den su
centro, ta simbolisa e conexion entre nos islanan y e spirito bibo y calor di e area Caribeño.
Awor cu nos ta cera e aña di aniversario, nos ta hopi orguyoso pa revela nos nomber y logo
nobo. Cu boso sosten continuo, nos ta sigui compromete na promocion di e rikesa cultural
enorme y e bunitesa natural di nos islanan.
Entrante awe Prins Bernhard Cultuurfonds Caribisch Gebied ta continua bou di un nomber nobo: het Cultuurfonds Caribisch Gebied
