Esey ta e conclusion cu parlamentario di Partido di Pueblo Arubano AVP, mr. Arthur Dowers a yega na dje despues di e atende e reunion di comision central hunto cu Minister di Transporte, Ursell Arends riba e asunto di taxista. Como miembro di e comision central aki, Dowers tabatin un interes grandi pa scucha directamente di e Minister y alabes haci pregunta al caso.
Ora cu e Arends a indica cu actualmente tin un sistema corupto y putri pa otorgamento di permiso di taxi, Dowers ta puntra su mes dicon a tuma e mandatario mas cu tres aña pa ripara esey. Mientras cu ora e titular di transporta a bisa kico ta su plan pa combati esey, por a saca afo cu e tin falta di empatia y sentido comun.
For di e manera con Minister Arends ta papia, y mirando cu mayoria permiso otorga ta door di politiconan di su partner den coalicion, esta MEP, ta conclui cu ta e partido geel e ta referi como corupto y putri. “El a sali ataca tur hende y si esey ta con e kier cambia e sistema, logicamente e ta bay haya resistencia,” Dowers a expresa.
Ora e comproba cu algo a bay en pugna di ley, e ta esun yama y cu autoridad pa hala permiso aden. Si e sistema mester cambia, anto Arends tin cu splica con na un manera habri y transparente pa tur hende compronde. Sinembargo, e ta keda forma parti y sostene un gobierno cu, ki ora cu haya un chens, ta nombra hende famia y amigo, cu tur dia ta hiba un practica di corupcion. E ora ey bo tambe ta forma parti di e sistema corupto y putri.
“E ta haci esey ora cu ta cumbinie,” Dowers a bisa referiendo na Arends. Si tin un debe di 20 miyon florin na belasting y bo departamento no a saca un carta, bo tambe ta responsabel y e consecuencia mester ta cu ta hala confiansa riba minister Arends y MEP mester tuma e curashi pa tuma e autoridad, segun Dowers a comenta.
Partido AVP diahuebs ultimo a manda un carta aden pidiendo Presidente di Parlamento pa yama un reunion publico cu caracter di urgencia, sinembargo ainda e peticion aki no a haya su contesta.
