Parlamentario Alvin Molina ta duna di conoce cu e proceso no a cana bon y ta pa e motibo aki mes tin tanto problema na e momentonan aki. Berdad ta cu integridad ta algo hopi importante riba tur cos cu un persona mester haci principalmente como mandatario y como representante di pueblo unda cu mester ta integro, pero tampoco integridad no por ta e meta, pero e meta ta sirbi e pueblo duna nan un servicio optimal anto haci esey na un manera husto y honesto.
E ley di transporte publico riba su mes ta hopi cla unda cu e ta duna e minister e autoridad “kan” y cu e por pone e maneho manera e ta haya ta bon y ta pesey e ta minister y esaki ta pone cu e MB nan mes no ta necesario. Sinembargo loke cu e mandatario ta haciendo cu e MB nan ta abase di supuesto corupcion unda cu e ta yama e taxistanan como cartel y ta perhudicando full e grupo di taxistanan cu dia aden y dia afo ta trahando eyfo y ta ganando nan pan di cada dia pa nan mes y nan famia. E mandatario ta perhudicando full e grupo abase algun acto supuestamente coruptivo cu lo a tuma luga cu no ni sa si ta berdad.
Loke cu ta un realidad si ta tur caminda cu hende ta traha por tin corupcion y esunnan responsabel mester haci tur cos pa evita esey y mester haci tur cos pa ora ripara corupcion t’ey pa bo interveni, pero bo mester interveni na esun cu ta comete e acto coruptivo y no castiga henter e grupo.
Te ainda no tin un claridad concreto riba e supuesto actonan coruptivo cu e minister a indica, pero si den conferencia di prensa por a mira e stapel basta grandi di supuesto casonan, pero te ainda ta 1 caso sa di dje.
Un taxista ta un emanzaak y loke cu no ta bon ta cu varios di nan no ta inscribi na camara di comercio y esaki sigur no ta aceptabel. Tur taxista mester cumpli cu nan deber di pago di belasting . Sinembargo ta mira disponibilidad di parti taxistanan cu kier drecha e situacion , pero no ta mira e disponibilidad di parti di minister. Sinembargo banda cu minister mester trata di resolve problemanan e mandatario a duna e taxistanan un problema extra.
Parlamentario Alvin Molina ta di opinion cu no ta e manera ideal pa pone un MB pa prome di september sin dialoga. Parlamentario Alvin Molina ta lamenta cu no ta mira disponibilidad di e minister pa yega na un decision fructifero pa ambos partido.