Nos tanki ta yen di gasolin, hahahahaha, nos speed si no asina lihe mas, pero di curason nos ta
sigui inspira tur rond di nos cu nos relatonan, segun e bunita cooperacion den prensa di nos
amigonan cu semper ta trese e bon noticianan tambe pa pueblo lector. Lady Ruth ta cuminsa pa
gradici prensa pa nan bunita cooperacion den publicacion di noticianan encuanto e actividadnan
bunita organisa pa Stichting Rancho bau guia di e dinamico incansabel Clifford Rosa y su team
dinamico di voluntario. Cu hopi lus ariba e 200 anja di Oranjestad 1824 -2024 y cu lus tambe
riba Anja di conmemoracion di historia di sclavitud, Dia di Tula, Dia di lucha pa libertad y ariba
“Land Back”. Nos ta comparti cu Diasabra ultimo a tuma lugar un bunita actividad relaciona cu e
temanan aki riba menciona, riba Plaza Nikki Habibe dilanti Djiespies cu un programa
interesante. Clifford a habri e anochi cu algun informacion enuanto e plataforma nacional
herencia di sclavitud na Aruba. Sigui pa e simpatico, semper inspira cu amor pa nos dushi idioma
Papiamento, Dr. Joyce Pereira cu un charla impactante “E lucha di Tula y su importancia pa nos
te awe “. Ki clase di libertad nos tin awe. Kico nos a sinja di Tula ? Kico ta nos derechonan. Ki
historia nos ta laga atras etc. Despues e cabayero scientifico cu hopi amor pa su paisanonan y
prohimonan indigena, Nigel Maduro, a papia di e tema “Land Back”.di e lucha incansabel pa e
pueblo indiginanan hanja nan tera bek, cu tanto anja biba cu coneccion spiritual cu Mama Tera,
cuidando y protehando nan tera na unda nan a nace y biba henter nan bida, cu awendia ta wordo
rosa sin pensa dos biaha, e danjo causa, pa sigui construi edificionan , cabando asina cu e
naturaleza y bida di e pueblonan indigena. Autoridadnan cu ta priminti cu no lo rosa mas mondi
pero no ta tene nan mes na nan palabranan di promesa hasi. Nos curason ta hasi dolor pero nan
no ta preocupa ni compronde cu nos isla ta chikito y no por carga mas !? Nan cu a bay scol di
dos piso ?!. Ki dia ta basta ?! Lady Ruth a hanya e oportunidad di por a recita su poema na e
idioma hulandes tocante sclavitud “ Gelukkig was ik er niet bij”. Contento y bendiciona di no a
biba e temponan ey y wak e esclavonan ta traha manera burico y sufri, wordo mal trata pa nan
shonnan. Durante e anochi impactante y emocional aki, Grupo di tambu electronico “Macuto
Bilongo” a duna nan fantastico presentacion musical di un bunita repertorio cu a cay na agrado
di e publico presente. Tawata Lady Ruth su prome experiencia cu Stichting Rancho y asina hanja
sa con importante ta nan trabao pa salvaguardia nos herencia. Con grandi ta nan amor pa
prohimo y sinti cu esnan cu tawata indirecto of directamente envolvi cu e tempo di esclavitud,
tambe aki na Aruba, pero, talbes no asina scur y mahos manera tawata e casonan na nos ruman
islanan Corsouw y Boneiro. Awendia cu e.o. traficacion forsa di hende y sclavitud moderno
lagando hasta muchanan traha den un of otro fabrica di traha sapato of panja etc. pa masha
masha tiki placa mes. E mundo ta ketobay bunita, ta e mente di hendenan malo ta laga pensa
como sifuera tur cos ta normal, pasobra e tawata existi semper. Ta pesey mes tin cu traha riba
leynan pa caba cu e bagamunderianan aki. Libertad ta un palabra di hopi peso. Ban comporta nos
den comunidad, ban respeta otro nan opinion, ban trata otro cu respet. Cuminsa na cas, despues
scol, deporte etc. Nos tur por ta liber cu e amor di Dios den nos cada un. Ta bon pa tin e 10
mandamentonan y leynan como guia y les pa nos. Ley pa un, ley pa tur. Lamentablemente no ta
tur ta wordo trata igual y hasta no ta wordo castiga pa su fout
No ta tur hende por anda cu poder. Cabes ta susha y consenchi ta poni “on hold”. Jammer !
Danki pa a lesa nos relato, awe cu un crenchi di Lady Ruth su sintimentonan encuanto libertad y
land back. Pensa y sinti pa boso mes, nos cada un cu nos mesun “sano huicio”. Pasa un bon dia!
Nos niun ta perfecto, pero nos por ta hendenan sincero y honesto cu bon trato igual.
