Ku hopi asombro, parlamentario Ramón Yung di frakshon di MFK a tuma
nota dje preokupashon i akusashon di parti di Man/Pin pa ku Minister Silvania, den kual
rerakshon e partido ta akusá Minister Silvania komo esun enkargá ku salubridat, di ta hiba un
maneho desastroso.
Parlamentario Ramón Yung alabes a tuma nota dje reakshon aki di Man/Pin, despues ku e
asosashon di spesialistanan den servisio di CMC a emití un karta habrí komo un “Yamada di
emergensia” na pueblo di Kòrsou.
Parlamentario Ramón Yung di MFK na promé lugá ta lamentá ku tantu e asosashon di
spesialistanan komo tambe Partido Man/Pin ta hunga ku sintimentu di e pueblo aki, tratando di
krea pániko inesesario i lider di partido Man/Pin den un deklarashon na prensa a kue un
posishon aun mas intransigente, indikando ku na su opinion, “e minister mester bai kas”.
Partido Man/Pin ta indiká ku CMC anualmente falta alrededor di 50 mion florin pa aña pa por
operá e hospital, pasó e kuido ta kosta entre 35 pa 42 mion florin mas pa aña i tambe tin
alrededor di 7 mion na gastu adishonal pa kuido di indokumentadonan.
Partido Man/Pin mes ta indiká ku gobièrnu ya a paga e plaka pa kuido di indokumentadonan te
ku aña 2023 i gobièrnu ke paga pa 2024, pero ku e kondishonnan fihá ta inaseptabel pa CMC i
tambe pa partido Man/Pin. Sinembargo, segun parlamentario Ramón Yung, tur loke gobièrnu ke,
ta un garantia ku lokual CMC ta kobra na kuido di indokumentadonan ta korekto i ta kuadra ku
realidat. Pa no resultá despues ku ta kobra gobièrnu sumanan fantasma pa kual no tin prueba ku a
duna sierto tratamentu na indokumentadonan.
Pasó den korte tambe CMC a eksigí 40 mion pa gastunan di transishon, kual korte a bai di
akuerdo kuné, ounke gobièrnu a pone komo kondishon, ku CMC mester por proba ku ta nan a
hasi e gastunan i ku no ta trata di gastunan ku talbes otro entidat ya a paga kaba.
A resultá ku dje 40 mion ku CMC tabata eksigí, nan a entregá faktura pa un suma di solamente 32
mion, di kual 30 mion a kontrolá kaba i kual gobièrnu a kumpli ku e pagonan. Pues te ainda a
keda un suma di 8 mion pa kual NO por entregá dokumentashon i indiká ku ta CMC a paga nan.
Pa loke ta trata e lista di espera na CMC, Partido Man/Pin ta indiká ku pashèntnan di wowo
mester warda mas ku 400 dia pa nan por haña un sita i asta ta bira siegu, sin ku nan haña fecha pa
por opera.
Parlamentario Ramón Yung di MFK ta kere ku eksponentenan di partido Man/Pin sea ta manera
“Chinina kome lubidá” of nan a kuminsa sufri di demensia.
Pasó hustamente e listanan di espera largu a pone ku Minister Javier Silvania a duna pèrmit na
Hòspital Advent pa por realisá sierto operashonnan i tambe a duna permit na entre otro “Pain
Clinic” i Dr. Sajouri Center pa nan tambe por realisá sierto intervenshonnan, hustamente pa baha
e preshon riba e listanan di espera. Banda di esaki, inspektor di salubridat sr. Keli, dia 2 di yüli
2023 a indiká na CMC ku e “aanwijzing” ku nan a haña ta keda vigente, pasó e palabrashon tabata
ku mester baha e listanan di espera, dor di pasa pashèntnan ku por realisá nan operashon na
Advent. Sinembargo, e listanan di espera a sigui krese.
Durante e reunion di Parlamento di dia 29 di ougùstùs 2023, direktor di CMC
a indiká ku CMC a logra atraé personal di kamber di operashon for di
Colombia i ku ainda tabata falta kaba regla e pèrmitnan di trabou i di estadia,
di manera ku por hasi uso dje personal i ku tur e salanan di operashon por ta funshonal.
Direktor di CMC, sr. Gilbert Martina na klousura dje reunion asta a indiká ku kosnan ta kanando
den bon direkshon, ounke ainda tin algun kos di hasi na CMC.
E direktor di CMC na final dje reunion a enfatisá ku:”Nos a kuminsá e reunion ku kanta nos
himno nashonal, ku ta bisa Ban duna di nos parti, p’e isla prosperá i nos ke finalisá ku esei. Ban
duna di nos parti pa nos isla prosperá, ban duna di nos parti pa CMC prosperá.
“Pasó e retonan finansiero ku CMC tin, e retonan di e lista di espera ku tin, reto di spesialista ku
tin, nos ta konbensí ku si nos tur duna di nos banda, CMC ta bai porosperá pa Kòrsou por
proseperá”. Tambe e direktor a indiká ku su mama semper a siñanan ku:”Promé bo bai hunga
pafó, hasi bo huiswerk promé. Anto nos ta kere ku tin hopi huiswerk ku nos tin ku hasi ainda pa
bèrdat CMC por bai duna pa Korsou por prosperá”.
Pues na momento ku parlamentario Ramón Yung a tuma nota dje karta habrí ku e asosashon di
spesialistanan a dirigí na pueblo di Kòrsou, e pregunta ku ta surgi mesora ta:”Kiko a kana robes
internamente na CMC, pasó e direktor na ougùstùs 2023 a bisa tekstualmente ku tin “huiswerk”
ku CMC mester hasi, promé ku por bai pafó. Alabes el a bisa:”ban duna di nos parti pa CMC por
prosperá, di manera ku Kòrsou por prosperá”.
T'e asina leu ku e kombersashonnan ta andando entre CMC, e “regie-groep” i e asosashon di
spesialistanan, mester a bin ku proposishon konkreto kon ta bai baha e listanan di espera na
CMC, pasó esei tabata un dje kondishonnan ku Konseho di Minister a pone, promé ku por papia
di un MB pa un kompensashon riba e kondishonnan di LNT.
Pa e motibu aki, pa parlamentario Ramón Yung di MFK, ta insólito kon e asosashon di
spesialistanan, sin ku a kaba yega na palabrashon konkreto kon pa redusí e listanan di espera, ta
konfrontá komunidat ku e komunikado aki, den kual praktikamente nan ta bisa ku debí na e
LNT, nan lo no por duna kuido di kalidat mas i ku e listanan di espera lo sigui krese! Tambe nan
ta indiká ku vários di e strukturanan di diskushon ku nan a hiba último tempu no a kondusí na e
resultado deseá.
Pa parlamentario Ramón Yung, ta inkomprendibel kon e asosashon di spesialistanan ku ta
formando parti di hustamente e grupo di trabou ku ta sintá na mesa i ku mester bini ku e
solushon kon pa yuda redusí e listanan di espera, awor ta sali duna tal deklarashon.
Na opinion di parlamentario Ramon Yung, algu ku for di un salida a bai kompletamente robes,
tabata momento ku e èks direktor di CMC a tuma spesialistanan den servisio, kambiando e
struktura di pago di BMS pa BPS, o sea pa un salario muchu mas haltu, pero sin ku a mara esaki
na kantidat i kalidat dje servisio ku kada spesialista mester brinda.
P A R L A M E N T O D I K Ò R S O U
Parliament of Curaçao Parlamento de Curazao Staten van Curaçao
Wilhelminaplein 4 Willemstad Curaçao
telefon +599 9 434-6000 fax +599 9 461-4491 e-mail: info@parlamento.cw website: www.parlamento.cw
Pasó ta
masha straño ku kada spesialista ta risibí un pago diferente a base di su
spesialisashon, kual ta mará na hustamente e konosementu ku e spesialista tin
i e kalidat ku e mester duna, atendiendo kasonan a base di kompleksidat, pero
awor e asosashon ta indiká ku debí na e LNT, lo no por garantisá e mesun nivel di kuido despues
ku introdusí e LNT.
Ku e komunikado emití, e asosashon di spesialista ta demostrá klaramente ku nan ke solamente
garantisá un bon pago di nan miembronan, sin ku ta mara esakinan na niun klase di faktor
kaminda ta midi produktividat, efektividat i kalidat di e servisio ku nan ta brinda komunidat i pa
kual SVB ta paga nan.
Resumiendo, parlamentario Ramón Yung ta kere ku tantu e posishon asumí pa Partido Man/Pin i
su lider Giselle McWilliam i tambe dje asosashon di spesialistanan na CMC ta sin mas inaseptabel.
Danki pa dediká atenshon na e komunikado aki den bo prestigioso medio di komunikashon