E bishita resien riba e barku krusero Carnival
Celebration, ku Tourism Corporation Bonaire (TCB) i Buki di Prèt Boneiru a organisá
konhuntamente, a sende un chispa di emoshon serka e habitantenan hóben di Boneiru.
Dia 14 di ougùstùs kasi 80 mucha entre 4 i 13 aña a haña un oportunidat spesial pa
eksplorá un barku krusero di bèrdat, i eksperensiá e vibrante Carnival Celebration
djaserka.
Despues di éksito di e evento di aña pasá, nos a haña ku lo ta un tremendo idea pa ripití e
eksperensia enrikesedor akí i duna mas mucha den nos komunidat e oportunidat pa haña
inspirashon i siña mas tokante e industria krusero. E entusiasmo i e fitbèk positivo di aña
pasá a aksentuá e impakto ku un evento asina por tin, i esaki a enkurashá nos pa organis’é
un biaha mas pa un grupo mas grandi di partisipante.
E evento tabata un meskla úniko di plaser i siñamentu. E muchanan a subi riba un barku
krusero di bèrdat, nan a deskubrí e diferente sekshonnan i nan a siña kon un barku ta
funshoná i kiko ta e mundu di hospitalidat. Banda di esaki e muchanan por a tira un bista
eksklusivo tras di kòrtina pa loke ta trata e preparashonnan pa e Carnival Celebration tan
sperá na nos isla.
Miles Mercera, direktor di TCB, a bisa: “E kolaborashon ku Buki di Prèt pa e evento akí
tabata un tremendo eksperensia. Ora nos mira e gana di siña i e entusiasmo di e
muchanan, esaki ta fortifiká e importansia di kreashon di e tipo di eksperensianan akí. E
eventonan akí tin un impakto permanente serka nos muchanan i ta inspirá nan pa
eksplorá i soña grandi.”
Kordialmente TCB ke gradisí Carnival Corporation, Buki di Prèt, e mayornan, e muchanan,
ofisina di haf i tur hende ku a hasi e evento akí posibel.
Durante henter e dia akí siguridat tabata un prioridat tòp, ku profeshonalnan eksperto ku
a sòru pa bienestar di kada mucha. Pa aktualisashon tokante eventonan i aktividatnan ku
ta na kaminda, bishitá nos página ofisial di Facebook: Tourism Corporation Bonaire.
