Desde 1 di juli 2024, e salario minimo riba e islanan BES (Boneiro, St. Eustatius y Saba) a subi pa ta igual
na loke ta e nivel minimo social of minimo di subsistencia (bestaansminimum). Esey ta un decision cu
Tweede Kamer a aproba aña pasa despues di a conoce e resultado di e estudio cu Comision Minimo
Social Caribe Hulandes a haci.
E estudio traha na 2023, lidera pa ex rector di Universidad di Aruba, Glenn Thodé, a resulta den un
rapport di mas di 200 pagina cu ta presenta su conclusion y 10 recomendacion pa Den Haag aplica. Entre
nan tin, fuera di aumento di salario minimo, tambe otro sugerencia den direccion di compensacion,
reduccion di tarifa di utilidad y transporte, etc.
No ta un secreto cu Oficina Central di Estadistica y Raad van Advies tin algun tempo caba batiendo
alarma pa e diferencia considerabel cu tin entre loke un persona ta gana y loke e tin mester pa biba.
Como consecuencia, nos isla a mira su indice di pobresa aumenta te na casi 40%. Mienstrastanto
minister di asuntonan economico a declara, cu e ta trahando ariba un definicion di pobresa pa Aruba ya
cu esey no ta existi.Como parlamentario independiente Croes ta convenci, cu ta existi un urgencia pa bin
mas cu djis e definicion di pobresa.
Recientemente, Thodé a declara na prensa cu Aruba tin mester di bin cu un estudio similar na esun cu a
haci pa islanan BES. Esaki lo yuda na identifica e sorto di hogar cu tin riba nos isla, cu por ta te hasta
nuebe diferente y specifica kico ta e necesidad di cada un. Otro aspecto cu e estudio por aclaria ta, por
ehempel, e patronchinan entre subsistencia (bestaan) y gasto di consumo (besteding) mey mey di nos
poblacion.
Croes: “Solamente cu e data aki gobierno por bay over na elabora obhetivonan pa combatimento di
pobresa na nivel nacional. Loke a haci na islanan BES ta ideal y Aruba tin un urgencia pa esaki tambe,”
asina Parlamentario Croes a bisa y indica su deseo pa pronto esey bira un realidad. A compronde cu otro
ministernan a duna di conoce cu nan tambe ta sostene e idea.
Un di e compromisonan di Gerlien Croes pa cu pueblo di Aruba ta cu lo keda pendiente di e desaroyonan
tras di esaki pa asina, como bon parlamentario, sali na defensa di e interes di tur ciudadano. Croes ta
keda para ariba cu gobierno a genera entradanan adicional y ta solamente husto pa compensa tur hende
den nos comunidad y alivia e peso financiero.
Parlamentario independiente, mr. Gerlien Croes: Un rapport urgente riba bestaansminimum ta e prome stap
