Si nan gañabo un biaha ta nan culpa. Si nan gañabo pa di dos biaha ta bo culpa paso bo no mester un gañado.Si nan a gañabo hopi biaha y bo a vota pa nan ta paso bo ta nan fiel votador. Aruba pa ultimo 22 aña a wordo goberna pa politiconan gañado cu durante campañata primiti shelo riba terra pero ora ta den gobierno nan promesa di campaña ta bira medida. A bira tempo pa pueblo di Aruba sali for di e circulo vicioso di politiconan gañado. Nos por corda riba e promesa di minpres cu durante campaña a laga sa di a studia e materia y cu partido mep den gobierno lo goberna sin medida. Un otro promesa falso ta di minister Glembert Croes cu a gañaMonchi cu prome cu 31 di december lo baha edad di pensioen. Kizas ta paso e no a bisa Monchi ki aña of ta despues cu ya monchi a muri caba.
Falta un 10 luna pa tin eleccion y nos por mira partido mep ta gaba di a subi reparatietoestag na 360 florin pa aña pero no kier bisa e pensionadonan cu nan a haya solamente awg.30,= riba e reparatietoeslag. Partido mep ta kere cu e pensionadonan ta bobo y lo gradici gobierno pa e gran logro di e awg.30,- cu nan ta ricibi. E awg.30,- no ta jega ni pa cumpra un saco di pinda.
Minister president a reuni cu e taxistanan cu ta protesta pa maneho di minister Arends cu parse a tuma un postura cu no ta habri pa negocia. Despues a jama un ministerraad extra ordinario sin resultado. Parse cu minister Arends a laga sa cu e no ta hala atras. Segun informacion cu nos di partido Curpa a ricibi ta cu minister Arends a pone cuchew riba mesa y si no tin sosten di ministernan lo e entrega gabinete Wever Croes na gobernador. Ministernan di partido mep a dobla y a papia un toontje lager pa gobierno no cay.
For di hopi tempo caba e matrimonio di e coalicion aki ta drumi cama separa. Cada dia e situacion ta bira mas pio. Parse cu minister Arends lo no bay firma e ontheffing tampoco pa Embassy Suites. Esaki lo bira un otro caso den corte cu nos ta kere cu Embassy Suites casi sigur lo bay pidi un dwangsom contra di gobierno. Nada nobo pa e minister caprichoso aki. Minister Arends no a cumpli cu veredicto di hues pa alivia Amsterdam Manor di e holo stinki y gobierno ta hay’e ta paga un dwangsom. Asina gobierno ta malgasta placa di pueblo. Ministernan ta kere cu nan ta doño di e placa di belasting cu pueblo ta paga y cu nan no por wordo poni personalmente responsabel. Macaco ta hunga cu su yui te ora e saca su wowo. Wel e wowo di e macaco cu yama partido mep y raiz su wowo a wordo saca.
E tempo di Dios ta perfecto y e luna di augustus aki ta un luna perfecto pa e gobierno basha den otro. Pueblo no por mas cu un gobierno di desastre.E supuesto parlamentarionan cristian a bira ciego pa e realidad alarmante existente causa pa e mal gobernacion. Nan ta complice di maldad y kier sigui cubri e maldad di e gobierno aki. Dios spaar nos dushi isla pa locual cu ta na caminda. E proximo eleccion pueblo lo haya chance pa vota pa un cambio y no vota pa un partido cu no tin temor di Dios. Partdo mep ta esun cu atraha e handboek di Aruba National Gender Policy p’esey mes nan ta contento cu e resultado di cassatie. Partido Curpa e unico alternativa.