Tin un temporada pa planta, un temporada pa krese i un temporada pa kosechá. Kada fase di bo bida ta prepará bo pa e siguiente fase.
Kerido invitadonan, miembronan di famia, sernan kerí, miembronan di prensa i ko-siudadanonan.
Mi ke bai bèk ku boso 33 aña pasá, ora ku komo hóben di apénas 19 aña mi a para ku mi famia na aeropuerto, nèt promé ku mi a subi avion di KLM bai laga mi isla natal atras pa bai studia na Hulanda. Ku apoyo di mi famia i e mensahe di mi wela ku trabou duru semper ta duna resultado, mi a primintí ku mi lo bini bèk pa sirbi mi isla. Despues di mi estudio mi a regresá!
Entretantu mas ku 28 aña a pasa. Mi a fungi den un variedat di funshon den vários organisashon privá i públiko. Trabou boluntario tambe mi a hasi den diferente fundashon den tur sektor di nos komunidat, manera entre otro kuido di hende grandi, kuido di personanan ku limitashon, kultura, ayudo sosial i vários otro organisashon.
Mi tabatin e suerte di topa lidernan ku vishon ku a duna mi konfiansa propio i espasio pa a desaroyá mi mes ku mi por a krese komo persona, krese den mi trabou i haña e konfiansa nesesario pa eksplorá horizontenan nobo.
E último añanan aki, i ku nos isla den un relashon estatal nobo den Reino Hulandes, konsientemente òf no konsientemente, ku regularidat mi tabata analisá ròl di gezaghèbernan di turno durante akontesimentunan na nos isla. Na vários okashon mi a puntra mi mes òf interkambiá ku mi sírkulo di konfiansa kon mi lo a atendé si ami tabata gezaghèber den e situashonnan aki. Mi ta kere ku inkonsientemente ami i mi e hendenan mas yegá na mi tabata preparando pa e momentu akí! E momentu pa asumí e responsabilidat di gezaghèber i duna un kontribushon aun mas grandi na desaroyo di nos isla i su abitantenan.
Boneiru …. Un isla den pleno desaroyo, fuerte i resistente!
E kresementu eksplosivo di nos isla durante e último añanan akí a nifiká hopi pa nos desaroyo sosial ekonómiko, pero a sòru tambe pa vários reto;
- Funshonamentu di gobièrnu;
- E sintimentu di kombibensia den nos komunidat den sentido mas amplio di palabra.
E retonan den funshonamentu di gobernashon
Bon gobernashon …un konsepto ku ta kambia ku tempu! E último 14 añanan aki nos a dal pasonan firme den bon direkshon riba e tereno akí, pero alabes nos ta konsiente ku ainda tin un kaminda largu pa bai. Bon gobernashon ta muchu mas ku djis sigui regla.
Bon gobernashon ta enserá tambe un komportashon ehemplar, i duna i risibí konfiansa basá riba rèspèt mutuo!
Esaki ta e balornan esensial na momentu ku ta trata di relashon efektivo i koperashon ku mester sòru pa yega na e resultadonan deseá pa tur enbolbí.
Rèspèt ta krea un kultura kaminda hende ta sinti nan mes balorá i skuchá. Esaki ta di vital importansia pa relashon entre hende ku hende, na nos isla i den Reino.
Pa ami komo gezaghèber lo ta fundamental pa stimulá e balornan aki tantu den e aparato gubernamental komo den nos komunidat.
Laga kada un di nos sintá den e sala akí i tur ku ta skuchá mi komprometé nos mes ku for di awe nos ta demostrá un nivel di liderazgo kaminda inklushon, rekonosementu di talento i kolaborashon ta pará sentral. Laga nos enfoká riba desaroyo kontinuo di Boneiru pa nos mes, pa nos yunan i pa e yunan di nos yunan.
Ban empoderá nos hendenan pa optimalisá uso di e kapital humano skars ku komo isla nos ta disponé di dje. Huntu sektor privá i públiko tin ku krea e kondishonnan adekuá pa esaki tuma lugá! Esaki ta nifiká entre otro sòru pa un sitio di trabou kaminda ta reina siguridat i integridat laboral, pone e hèrmèntnan adekuá na disposishon pa por funshoná optimalmente i krea un sitio di trabou sólido kaminda desaroyo profeshonal ta e meta kontinuo.
Ku e meta aki fihá kontinuamente na horizonte, nos, komo gobièrnu mester duna e bon ehèmpel, fihando un vishon kargá pa e aparato gubernamental den su totalidat. Komo gezaghèber esaki lo ta un di mi puntonan prinsipal di enfoke.
Nos ta biba den un tempu di kambio kaminda ta surgi individualismo den nos komunidat. Esaki ta notabel tambe den e konteksto polítiko i atministrativo. Kombibensia, empatia i kompashon ta fundeshi di un komunidat salú i fuerte. Un komunidat ku ta krea un ambiente ku ta halsa nos nivel di felisidat muchu mas. Un kos ku mi sa sigur ta ku e lidernan den nos komunidat ta pone e tono ora ta trata di normanan di kondukta manera kombibensia, empatia i kompashon.
E retonan den sentimentu di kombibensia.
Mi a menshoná awor ei ‘nos hendenan’. Ken ta nos hendenan? Mi definishon di nos hendenan ta: e individuonan den nos komunidat ku na nan manera ta kontribuí positivamente na desaroyo di Boneiru. No ta importá edat, nashonalidat, sekso ni religion.
Den tempu di kambio, komo ser humano, nos tin e tendensia di lanta muraya haltu pa protehá loke ta “ami”, e individuo òf “nos”, mi grupo for di loke ta “e otro.” Konsiderando e ritmo di kambio i komplehidat di nos mundu di awendia, pues aki na Boneiru tambe, diariamente por tuma nota di e tantísimo konfliktonan di “nos kontra nan”. Mi ta hasi un apelashon riba un i tur, spesialmente e lidernan den nos komunidat, pa nos hiba diskushonnan sano tokante maneho òf kambio di maneho ku ta nesesario pa krea bienestar i felisidat pa tur habitante di Boneiru. No laga nos mes kana drenta e kanaster di antagonismo i polarisashon, konsiderando gruponan den nos komunidat komo orígen di nos problemanan…..
10-10-10 a trese desaroyonan signifikante riba tereno sosial ekonómiko i tambe tereno di edukashon, kuido médiko i hustisia i siguridat. Pa medio di esaki nos poblashon a krese i ku esaki lamentablemente tambe e sintimentu di nos ku nan. Mi ta hasi un apelashon riba nos lidernan i riba nos komunidat kompleto pa nos uni pa enfrentá nos retonan saliendo for di nos forsa i resistensia komo komunidat, semper ku amor i rèspèt pa otro. Komo gezaghèber mi tin e responsabilidat pa kana dilanti i vigilá e desaroyo aki hopi di aserka i kaminda ta nesesario intervení.
Naturalmente tin hopi mas tópiko den nos komunidat ku mester di atenshon pero mi promé palabranan awe ta dirigí riba nos sentido di patriotismo i kombibensia ku ta forma e fundeshi pa sigui desaroyá sanamente komo isla.
Mi kier terminá gradisiendo e komunidat boneriano pa e sosten, e bon deseonan, e konsehonan i te asta e atvertensianan ku mi a risibí den e simannan tras di lomba. E palabranan aki a i ta yená mi ku e forsa i siguransa ku ta nesesario pa karga e responsabilidat akí ku boso respaldo.
Un gradisimentu ta bai na e komishon di konfiansa ku tabatin e tarea di skohe un gezaghèber nobo pa Boneiru pa nan trabou i konfiansa den mi persona. Un gradisimentu tambe na kada miembro di nos Konseho Insular, nos Kolegio Ehekutivo i nos Sekretario Insular i su tim pa tur e sosten ku mi a risibí serka nan.
Pa motibu ku mi tabata bon mucha na skol i a topa mener Oleana bèk den su kalidat di gezaghèber, mi a risibí i ta risibiendo un traspaso kaluroso i e sintimentu ku gezaghèber interino Oleana no solamente ke pasa informashon di trabou pa mi pero mas ainda e ke pa mi ta eksitoso den loke mi ta bai hasi. Nolly masha, masha danki i tambe na bo esposa Ann.
Last but not least, un gradisimentu (mirando e kantidat di tempu den e programa mi ta mantené kòrtiku sin menshoná nòmber) primeramente na e Ser Supremo, na mi famia, mi mayornan, mi rumannan, mi suegra i suegro i espesialmente mi kasá i mi tres yunan ku ta karga ku mi tur dia i ta inspirá mi tur dia di nobo pa ta un mihó hende, mihó kasá i tambe un mihó tata…… Tur dia di nobo mi ta krese den esaki. Sin boso sosten mi no por ta pará aki awe.
Pa ami ta un gran honor pa por sirbí mi isla komo gezaghèber. Mi mishon komo profeshonal ta pa sirbi mi isla i mi por logra esaki solamente ku boso sosten!
– Gezaghèber John Soliano
