Parlamentario Marco Berlis (MEP) ta papia di: Referendum, e derecho di pueblo pa scoge su mesun destino.

Pa hopi e ta un secreto ainda cu Aruba no conoce un ley di referendum den su constitucion.
Algun persona a acerca mi y otronan a skirbi mi cu tin un referendum hancra den nos
constitucion. Berdad, tin un referendum den nos constitucion hancra, pero e referendum aki
solamente por wordo usa si en caso un dia e pueblo di Aruba dicidi pa Aruba bira un pais
independiente. E referendum existente no por wordo usa pa niun otro topico mas. Ta pesey ora
cu mi a descubri e dilema aki, mi a dicidi di bin cu un ley di referendum cu si por cubri
topiconan cu ta preocupante den e desaroyo di nos pais.
“Pueblo lo por dicidi riba temanan controversial.”
Un ehempel di topico cu e ley di referendum lo por wordo usa ta si pueblo kier un opina y vota
riba un topico controversial. Nos por tuma nota cu e ultimo decadanan nos no a wak un
referendum wordo teni na Corsou of e otro islanan. Referendum no ta algo cu ta wordo yama pa
cualkier topico. Un ehempel di un topico controversial por ta e topico di abortus. Esaki ta un
topico cu ta impacta nos comunidad profundamente, pasobra e ta afecta nos norma y balornan,
nos cultura, tradicion y fe. E ley di Referendum ta duna pueblo un recurso poderoso pa vocifera
y indica na e politiconan cual ta e boluntad mayoritario di pueblo. Ta importante e ora pa
compronde cu pueblo no tin mester di warda te ora eleccion ta dilanti porta pa por vocifera su
preferencianan riba un topico controversial. Si ainda e politiconan tribi di ignora e bos di nos
pueblo den un referendum, sigur e siguiente eleccion pueblo lo sa di “mandanan un mensahe cla
y raspa.”
E Ley di Referendum ta cla pa bay Raad van Advies na Augustus 2024
Como representante di pueblo mi tin varios ley di inciativa ta canando nan proceso. Mi prome
ley ta uno cu lo cambia nos constitucion pa inclui referendum. E ley di referendum a keda cla
Diabierna 12 di Juli 2024, y awor mester wordo entrega oficialmente na Parlamento dia 19 di
Augustus 2024, pa despues e por sigui su caminda pa Raad van Advies. Mi ta sumamente
contento y satisfecho cu pronto e ley di referendum lo cuminsa cana su proceso y ta spera cu nos
lo por trate ainda pa fin di e aña aki of comienso di 2025.
Lo mi continua di haci bon uso di mi tempo den Parlamento pa bin cu leynan esencial cu lo
protege y empodera nos pueblo. E ley di referendum lo magnifica e poder y bos di nos pueblo, y
lo midi pueblo su curason y boluntad. Pueblo su sentimiento, balornan y tradicion mester wordo
honra y como parlamentario sigur mi ta sinti mi privilegia di por yuda empodera e bos di mi
pueblo.