Den e di dos kuartal di 2024, produkto i servisionan di konsumidó na Boneiru tabata 2,5
porshento mas karu ku un aña anterior. E inflashon ta mas abou ku e promé kuartal di
2024, ku e momentu ei tabata 3,4 porshento. Esaki CBS ta informá a base di e índise di
preis di konsumidó pa Hulanda Karibense.
Na Sint Eustatius preisnan a subi 2,5 porshento pa aña den e di dos kuartal di 2024, den
e promé kuartal di 2024 nan a baha ku 0,4 porshento. Na Saba, e inflashon tabata 2,0
porshento den e di dos kuartal di 2024. Den e promé kuartal di e aña aki ainda e
inflashon tabata 1,9 porshento.
Preisnan na Boneiru 1,0 porshento mas haltu kompará ku e kuartal anterior
Preisnan na Boneiru a subi den e di dos kuartal kompará ku e promé kuartal ku 1,0
porshento. Diferente grupo di produkto a marka un oumento. Manera preis di remedi pa
propio kuido ku un subida di 8,1 porshento kompará ku e promé kuartal di 2024. Tambe
gasolin a subi 6,7 porshento e kuartal aki. Komestibel a bira e kuartal aki 0,9 porshento
mas karu, aki spesífikamente preis di berdura fresku a bira mas karu.
Preis di pasashi di avion a bira 6,8 porshento mas barata kompará ku e promé kuartal di
2024 i ku esaki a duna un efekto di bahada riba e desaroyo di preisnan.
Preisnan na Sint Eustatius 2,0 porshento mas haltu ku e kuartal anterior
Na Sint Eustatius e preisnan pa konsumidó a subi den di dos kuartal di 2024 ku 2,0
porshento kompará ku e promé kuartal. E preisnan di transporte a subi den e di dos
kuartal, pasashi di avion a bira 8,9 porshento mas karu ku e kuartal anterior. Pasashi di
barku a subi ku 28,4 porshento. Ademas den diferente grupo di produkto manera
muebel, artíkulo di baño i servisio di telefòn i internet tabatin oumentu di preis.
Finalmente e preisnan den hóreka tambe a subi levemente ku 1,0 porshento kompará ku
e kuartal anterior.
Preisnan na Saba a subi ku 1,2 porshento kompará ku e kuartal anterior
Preisnan na Saba a oumentá den e di dos kuartal di 2024 ku 1,2 porshento kompará ku
e kuartal anterior. Diverso artíkulo i servisio a bira mas karu, manera artíkulonan di baño
i demas artíkulo pa higiena personal ku respektivamente 5,9 porshento i 4,5 porshento
kompará ku e promé kuartal di 2024. Ademas muebel i tapeit a subi ku 2,6 porshento
kompará ku e kuartal anterior. Preisnan pa produkto pa mantenshon i reparashon di
bibienda a baha leve ku 2,3 porshento den e di dos kuartal.
A frena e oumento den e di dos kuartal ku e preisnan pa pasashi di avion. Esakinan den
situashon normal ta subi na preis den e di dos kuartal, pero e kuartal aki preisnan a keda
stabil.
Sifranan provishonal
E sifranan tokante e di dos kuartal di 2024 ta provishonal i ta stipulá nan definitivamente
na momentu di publikashon tokante e di tres kuartal di 2024. A ahustá e sifranan
provishonal pa e promé kuartal di 2024 ku sifranan di Coicops ku a entregá despues
tokante salubridat i diverso produkto i servisio. Ademas pa Sint Eustatius a bini kambio
den e índise pa transporte relashoná ku kambionan ku ta resultado di e análisis i
prosesamentu definitivo di dato.