Tourism Corporation Bonaire (TCB), den kolaborashon ku
Bonaire International Airport (BIA) i Bonaire Hotel and Tourism Association (BONHATA),
a organisá e segundo Bonaire Tourism Update pa 2024 riba 11 di yüli 2024 na Delfins
Beach Resort.
Miles Mercera, direktor di TCB, a kompartí e resultadonan preliminar ku ta indiká ku
Boneiru a duna bon biní na 94,047 bishitante stayover durante e promé mitar di e aña
(yanüari-yüni 2024), kompará ku mesun período den 2023, ora e total tabata 88,749, i den
2022 tabata 85,100. Entre yanüari i mei, un total di 89 barku di krusero a bishitá Boneiru,
ku un total di 208,810 pasahero, kompará ku 2023, ku tabatin 108 barku di krusero ku un
total di 275,702 pasahero. Tambe a duna informashon tokante trade show ku otro
eventonan ku ta bini unda TCB lo tuma parti; manera kampañanan andando ku KLM, TUI,
PSV, etc. Riba e isla, TCB ta prepará aktualmente pa eventonan manera Regatta di e aña
akí, Boneiru Tourism Summit, eventonan di Taste of Bonaire i Boneiru by Night, djis pa
menshoná algun. Diferente biahe di prensa for di merkado europeo i norteamerikano
tambe ta planifiká pa e lunanan benidero. TCB i su sosionan riba e isla tambe ta prepará
pa e buelonan inougural di JetBlue i Corendon den novèmber. TCB tambe a kompartí e
reto di e industria pa 2024, manera e fondo nesesario pa logra e meta nan ku ta stipulá
den STMP 2017-2027.
Veroesjka de Windt, direktor di BONHATA, a raportá ku e porsentahe di okupashon (Occ
%) den e promé mitar di 2024 a oumentá un tiki kompará ku mesun período den 2023.
Sinembargo, e sifranan ta mustra un bahada den Occ % despues di mart, loke ta
konsistente ku 2023. E promé kuartal di 2024 a kuminsá ku un tarifa promedio diario
(ADR) mas abou ku den 2023. Sinembargo, pa aprel, ADR tabata estabilisá i a pasa e ADR
di segundo kuartal di 2023. E kambio positivo akí probablemente ta debí na ahustenan
stratégiko di preis pa esnan ku ta proveé akomodashon. Segundo kuartal a demostrá un
ingreso miksto pa kamber disponibel (RevPAR) pero generalmente un tendensia di
mehorashon. Mei i yüni a mira mehorashon signifikante kompará ku mesun luna den
2023, probablemente debí na e oumento di ADR i un stabilisashon òf mehorashon den e
porsentahe di okupashon. E pronóstiko pa e terser kuartal di 2024 ta mustra un
panorama prometedor ku un tiki mehorashon den ADR i RevPAR. Aunke e Occ % ta
mustra un bahada leve, e ta keda relativamente stabil, indikando un demanda
konsistente.
Maarten van der Scheer, direktor di BIA, a notifiká un redukshon chikí den e kantidat di
buelonan for di Hulanda pa e segundo kuartal di 2024 kompará ku e segundo kuartal di
2023. E desaroyo di e transportadónan inter-isla tabata stabil, mientras ku merkado
norteamerikano tabatin un bon aktuashon den aprel. E perspektiva pa e lunanan di
verano ta parse bon, ku un kresementu chikí pa e merkado europeo i norteamerikano.
Ademas, aeropuerto ta kontinuá ku desaroyo durante henter aña.
