Corte Superior a dicta sentencia awe den e caso penal Avestrus contra e ex-minister di Infrastructura di
Aruba y actual parlamentario O.B.S. y seis otro sospechoso.
S. a wordo condena na un castigo di prison di 48 luna di cual 12 ta condicional cu un tempo di prueba di
3 aña. Ademas S. a perde e derecho di pone su mes candidato den eleccion y e derecho di ocupa
cualkier cargo durante un periodo de 5 aña. Ministerio Publico a exigi un castigo di 48 luna di prison
contra e ex-ministro. Segun Ministerio Publico, el a haci su mes culpable di soborno, defraudacion di Pais
Aruba, abuso di su cargo y malversacion di fondonan.
E sospechoso P.T.A.S., ex-ambtenaar di DOW, a wordo condena na 30 luna di prison, di cual 10 luna ta
condicional cu un tempo di prueba di 3 aña pa soborno y labamento di placa. Ademas a declara
verbeurd e suma di 1,3 miyon Dollar confisca na Curaçao.
Corte Superior a condena e sospechoso M.L.A. pa un castigo di prison di 24 luna di cual 12 ta condicional
cu un tempo di prueba di 3 aña pa oplichting di Pais Aruba y soborno di e ex-ministro.
E sospechosonan C.R.M., E.R.W., N.D.N. y C.D.H., acusada di fraude y falsificacion, a wordo absolvi pa
Corte Superior.
Ex-ministro S., hunto cu co-sospechoso M.L.A., a estafa Pais Aruba, entre otro acusacionnan. Cu e accion
aki, el a pone na berguenza y a perhudica gravemente e confianza den un gobierno cu ta actua cu
integridad. Ademas e imagen di Pais Aruba a sufri dañonan grave a consecuencia di e accionnan di S.
Consecuentemente e accionnan di S. tabatin tambe un influencia subversivo riba sociedad di Aruba.
