Torneo cu hopi pisca y sorpresa a duna oportunidad pa
celebra e ofishi noble aki Diadomingo ultimo 30 di juni 2024 a celebra Dia di Piscado en grande na Centro di
Pesca Hadicurari. Ey pa mas cu 30 aña a bin ta celebra en cooperacion cu Santa Rosa
(LVV) e dia internacional di Piscado, declara pa Nacionnan Uni, e biaha aki atrobe cu
un torneo di pesca di y pa piscado. Marduga tempran a sali 31 boto registra pa e
torneo y ya pa merdia nan a bolbe pa pisa nan captura. Na final di e atardi 29 boto a
pisa pisca oficialmente den 2 categoria. Tabata tin boto grandi, ariba 24 pia largo y
boto chikito bou 24 pia largo. Entre esakinan, a registra nada menos cu 542.1 kilo
total. Mester remarca cu ta unicamente cu ta e 2 piscanan mas grandi di cada categoria
tabata pisa y asina por ta sigur cu hopi mas kilo a ser treci abordo y cual ta ser calcula
cu rond di 800 pa 1200 kilo a wordo gara door di e 31 botonan aki durante e orario di
6 pa 3'or cu a permiti piscamento. Sin duda un bon demostracion di e potencial di nos
piscadonan pa abastece Aruba di alimento fresco y di calidad.
Reconocimento baluartenan di piscamento:
manera ya ta e custumber na torneonan di pesca ta tuma tempo pa rindi homenahe na
baluartenan di piscamento. Den e ocasion aki a haci oportunidad pa no unicamente
rindi homenahe na individuonan cu ta destaca den piscamento pero cu ta forma parti
di un famia of un clan di piscado. Piscamento ta cos di famia cu hopi biaha ta pasa di
generacion pa generacion y unda henter famia ta envolvi.
Pa e motibo ey mes, a opta e biaha aki pa rindi homenahe na algun piscado y alabes
henter e famia. A duna reconocimento na rumannan Jacintho "Chin" Christiaans y
Enrique "Jack" Christiaans, yiunan di fundador di Hadicurari, sr. Colin Christiaans
d.f.m. y tambe a reconoce henter e famia Christiaans cu a lanta den piscamento.
A duna tambe reconocimento na Nando y Nacho Eduwardo y na mes momento e
rumannan Eduwardo den totalidad, incluso Louchi y Dennis, pa nan aporte na
piscamento y participe desde inicio na e Centro di Pesca Hadicurari.
Ganadornan mayor ehemplar:
E premio pa e Conofes mas grandi a bay pa e team Hernandez di capitan Alwin
"Macamba" Hernandez di e boto Queen Lucia cu a pisa 4.6 kilo
E categoria di Jacks a keda domina pa un Brazi cu a kibra balansa na 20.2 Kilo, treci
tera door di e boto My Darling di capitan Pablo Erasmus.
E Dorado di mas grandi a pisa 6.3 kilo di e boto Let's Go di capitan Jairo Koolman di
team The Koolmans for di Bucuti Yacht Club.ds
E picuda mas grandi a keda pisa door di e boto Caroline di capitan Marcelino de Jezus
cu a pisa 9.8 kilo.
E Tuna mas grandi a bay pa e boto My Darling di capitan Pablo Erasmus pisando 7
kilo.
Snapper of Pargo mas grandi di e torneo a bay pa e boto Vilesca di Capitan Omar
Andrade cu a pisa un bunita ehemplar di e pargo di awa hundo Savonet of Sabonechi
di 7.0 kilo.
E categoria di Grouper of Djampou/Mero, a bay pa e team cu a yama nan mes Chinos,
di e boto Ida di capitan Eric "Chicks" Tromp cu a pisa un Djampou di 10 kilo durante
e torneo.
E Pishiporco mas grandi a bay pa team Picuda Boys, di capitan Jacintho Christiaans
di boto Doña Filomena, cu a pisa un monster Pishiporco di 2.2 kilo.
E premio mayor ehemplar pa e pisca Bonacanap a bay pa e team Kokodek di Boto
Thalassa di capitan Jordan Wernet cu a pisa 400 gram.
Varios reto special a ser premia e biaha aki:
Cu un pisca inusual, yama "Baboso" di 8.2 Kilo di e team di boto Vileska di capitan
Omar Andrade a bay cu e premio di categoria "otro" y sigur a keda marca como un di
e capturanan mas raro treci na balansa durante historia di e torneo na Hadicurari. E
nomber Baboso ta bin door di pa su gran cantidad di baba cu e tin na su curpa. Na
ingles e ta conoci como, Barrelfish y su nomber cientifico Hyperoglyphe perciformis.
Un premio of reto special, cortesia di e organisacion nativo di piscado "Baranca Boat
Fishing Aruba", pa e Hudiu, Tilefish na ingles, a keda den man di e hoben tripulacion
di e boto Thalassa cual nomber di team tabata "Kokodek" di capitan Jordan Wernet.
Un otro reto special di e torneo tabata e categoria yama "Baraha di Suerte", unda a
reta piscadonan pa trata di trece 7 di e 12 categorianan menciona aki riba, esta e
categorianan di mayor ehemplar. E boto Thalassa di team Kokodek di capitan Jordan
Wernet a bay cu e premio aki tambe registrando pa prome biaha den e 3 torneonan cu
a ofrece e premio aki sin logra un ganador pues marcando historia un biaha mas.
E categoria Mulato, a keda aden e biaha aki, unda e unico ehemplar Mulato cu a
drenta, pisando 19.8 kilo a ser treci na pier despues cu e orario oficial pa yegada a
pasa y a keda descualifica lamentablemente.
E reto special pa bin cu un Swordfish tambe ta un premio cu pa prome biaha ta ser
cumpli cune despues di 3 torneo ofreciendo esaki. Anto no tabata 1 swordfish a yega
balansa, sino 3 Swordfish total. E ganador absoluto di e reto aki a bay pa e boto
Ocean Pinnacle di capitan Carl Danny Yarzagaray cu a trece e Swordfish mas grandi
pisando 54.9 kilo y un di dos ehemplar cu a pisa 31 kilo. Un di tres Swordfish tambe a
yega balansa anto tempran, tabata un ehemplar di 44.9 kilo di e team di boto Fish On
di
capitan Sergio Rasmijn.
Torneo di strategia:
E torneo aki tabata un torneo di strategia unda tabata reta piscadonan pa pensa unda
nan ta bay, con largo ta bay y ki tipo di armacion y piscamento nan ta bay haci door di
ofrece premio pa mayor ehemplar y alabes pisando unicamente e 2 ehemplarnan mas
grandi di cada categoria. E total di e 2 ehemplarnan registra ta wordo conta pa loke ta
total kilahe y pa esaki tambe tin premio pa di 3, di 2 y prome lugar pa cada categoria
di boto.
Ganadornan categoria chikito:
Na di tres (3) luga di total kilahe entre e botonan bou 24 pia a keda e boto Rosalia di
capitan Tibo Vazuez biniendo for Centro di Pesca di Spaans Lagoen cu 35 kilo di
total kilahe registra.
Na di dos (2) luga a keda e boto My Darling di capitan Pablo Erasmus cu a pisa total
42.3 kilo.
Ganador absoluto di e categoria di boto bou di 24 pia, y alabes a bay cu e pot di e
categoria, tabata e boto di Fish On, di capitan Sergio Rasmijn, cu a pisa un total di
44.9 kilo y cual a bay tambe cu e premio di pisca mas grandi di e categoria boto
chikito
Ganadornan categoria Grandi:
E plakaat y efectivo como premio pa di tres (3) luga di categoria di boto mas grandi
cu 24 Pia a bay pa e boto Vileska di capitan Omar Andrade cu a entrega na balansa
33.4 kilo di pisca di e diferente categorianan permiti.
Di dos (2) luga di total kilahe di categoria boto grandi a keda den man di e capitan
Jordan Wernet di boto Thalassa cu a pisa 33.5 total di pisca.
E prome (1) luga di e categoria aki a keda cobra pa e boto Ocean Pinnacle di capitan
Carl Danny Yarzagaray cu a pisa un total di 85.9 kilo y tambe a bay cu e pot di e
piscadonan. Ocean Pinnacle a bay cas tambe cu e premio pa e ehemplar mas grandi di
tanto e categoria como henter e torneo cu un Sworfish di 44.9 kilo.
Un danki tur participante voluntario, sponsor y cooperacion:
Fundacion Centro di Pesca Hadicurari y Departamento di Agricultura, Cria y Pesca
(Santa Rosa) y henter e comision organisador ta yama danki na tur e participantenan
cu a tuma parti den e celebracion di Dia di Piscado. Tambe ta gradici tur voluntario,
sponsor y demas colaborador y contribuidornan pa nan aporte na haci esaki posibel y
converti e ocasion di un exito contagioso pa rindi tributo na e ofishi noble di
piscamento na Aruba. Danki particular tambe ta bay pa Minister T.I.N.O., encarga cu
pesca pa su contribucion na e torneo , tanto pisamento como tambe forma parti di
entregamento di premio. Un palabra di danki ta bay tambe na Parlamentarianan
Darlaine Guedez Erasmus y Shailiny Tromp Lee pa forma parti di e celebracion y
entrega di premio na nos piscadonan.
