Camara di comercio Aruba ta persisti cu cobra su miembronan pa acceso online ta na su luga, Segun camara di comercio nan no ta actuando contra ley. Abogado Dello Gomes ta duna di conoce cu tin dos ley, uno ta e ley di registro comercial y e di dos ta ley di camara di comercio. Den e ley di registro comercial ta bisa cu cualkier cobransa cu mester wordo haci cu tin di haber cu e registro comercial mester bay den un forma di decision di retributie (Retributiebesluit) di e handelsregister verordering.
Dus si mester mira esaki tin un handelsregister besluit y eyden ta para cu por cobra 15 florin pa un uitreksel punto, e no ta bisa un uitreksel na hulandes of ingles. Pa cierto copianan por cobra 3 florin y tin algo otro cu nan por cobra 5 florin. Sinembargo no ta para ningun caminda den e decreto legal pa Pais Aruba cu camara di comercio por cobra 1200 florin pa aña pa un miembresia ricibi e acceso online , no ta para cu por cobra 300 florin pa haya acceso na e kwartaal, no ta para paso ta haya un uitreksel na ingles y ta costa nan mas pa produci esaki y cu miembro di KVK mester paga 30 florin.
Si mester mira bon e discusion a Sali riba e acceso online pero na momento cu abogado Dello Gomes a bay studia e materia a bin tuma nota cu tin un lista di producto cu camara di comercio a cobra aña aden y aña afo na comercio y individuonan sin cu nan tabatin un base legal.
Sinembargo abogado Dello Gomes ta duna di conoce cu su prome argumento mester bin cu un landsbesluit HAM den un handelsregister besluit unda cu por hancra e tarifanan nobo. Camara di comercio mester cana e caminda ey y trahe. Sinembargo mester tene cuenta cu un retributie mester ta kostendekkend hera e mester paga e gastonan y hera e no mester paga e castonan. Camara di comercio NV ta kere cu esaki ta un profit center y kier dies tira sumanan den halto y cobra e comunidad di Aruba sin cu nan tin base legal pa por haci esaki.
Sopone cu mañan mester regla esaki den un LBHAM, no ta zomaar por yega dies pone un costo di 1200 florin tampoco.
Abogado Dello Gomes a analisa e ley y KVK ta bisa cu nan tin un ley di camara di comercio , esaki ta berdad, y den e ley di KVK tin un liña cu ta bisa cu KVK por cobra pa huur di nan inrichting cu ta nan facilidad y nan por cobra un contribucion pa otro servicionan. Segun Delo Gomes si KVK por cobra retributie, e retributie ta un termino legal y e ta cay bek riba e retributiebesluit cu mester bin pa nan por cobra sin esaki KVK no por cobra. Esaki ta duna di conoce cu Camara di comercio no ta actuando conforme ley di Aruba.
Abogado Dello Gomes a busca un poco mas leu di e situacion unda cu a tuma nota cu na aña 2022 camara di comercio di Curaçao a cambia e mes un ley cu a trece padilanti cu Aruba mester cambia, Corsou si a cambia e ley pa haci posibel pa por cobra pa acceso pa e registro via di internet. Gobierno di Corsou, Raad van Advies di Corsou y parlamento di Corsou a pasa riba e cambionan y a aproba esaki pa camara di comercio di Corsou.
Sinembargo na Boneiro a sosode e mes un cos den e mes un aña 2022 gobierno di Boneiro cu tin full e sosten di aparato registrativo di Hulanda a haci e mes un cambionan cu Corsou a haci y a sigui e mes un procedura cu Corsou a haci. Boneiro a cambia e handelsregister besluit y bisa pa por cobra acceso pa internet a introduci e tarifanan pa Boneiro. Ley di camara di comercio di Curaçao y Boneiro ta mes un cos cu esun di Aruba, pero ta na Aruba so ta bezig ta practicando inhusticia y actonan contra ley, mas ainda kier ta wrong and strong.
Camara di comercio Aruba enbes di tene na cuenta y respeta e leynan di Aruba y cana e caminda corecto y no hunga duro siendo cu na momento kisas a haci un cobransa cu tur e bon intencion , pero e no ta corectamente haci , mester por ta habri y acepta cu por haci un eror pero grandesa ta pa reconoce esaki y no para wrong and strong poniendo un comunidad den desbalance di kico ta bon of no unda cu na final ta e miembronan y comunidad ta Sali perhudica riba decision nan robes cu ta keda tuma sin cu para pa e responsabilidad di acepta esaki y drecha esaki manera mester ta pa Aruba. Tur tarifa cu camara di comercio Aruba kier cobra mester ta den un forma di retributie y no ta asina nan lo por gana placa dies pa gana placa.
Abogado Dello Gomes tin comprension y ta kere cu pa drey un KVK e ta costa placa, pero na mes momento ya caba camara di comercio ta haya un contribucion for di tur su miembronan unda cu ta paga pa haya e servicio. Na momento cu kier amplia servicio camara di comercio mester cana e caminda adecuado y e caminda di ley corectamente.