Diabierna anochi a tuma luga un ceremonia dilanti di Bestuurskantoor pa cende luznan Rainbow pa ilumina Bestuurskantoor. Minister di Medio ambiente y integridad Ursell Arends a hiba palabra na e grupo di LGBTQ+ presente unda cu vocifera y kier pa nan sa cu Partido RAIZ ta mira nan,scucha nan y ta para hunto cu e grupo di LGBTQ+ den comunidad di Aruba.
Segun Minister Ursell Arends lider di partido RAIZ ta duna di conoce cu ta reconoce e grupo di LGBTQ + nan balentia cu a demostra pa nan ta loke nan ta y ta nan mes. Pesey mes ta celebra esaki hunto cu e grupo di LGBTQ+. Te na e momentonan aki e trayectorio no tabata facil. NO ta un biaha pero dos biaha por a mira esfuersonan pa sigura e derechonan di matrimonio di mes un sexo wordo rechasa na parlamento, esaki ta un lastima segun minister Ursell Arends.
Segun e mandatario den su bista e ley di matrimonio di mes un sexo ta dies un tardansa y e ta un contra tiempo pero no ta laga esaki demotiva partido RAIZ pero mas bien a reenforsa e compromiso pa bringa mas duro pa igualdad y husticia. No ta existi un discusion si un persona di e comunidad LGBTQ+ mester tin e mes un derechonan cu otro ciudadanonan of no. Segun Minister Ursell Arends tur Arubiano tin derecho igual unda cu tur hende ta pensa esaki y kier demostra cu Partido RAIZ ta para hunto cu grupo di LGBTQ+ cu ta e lucha di un Arubiano pa derechonan ta un lucha di nos tur.
Segun Minsiter Ursell Arends ONE HAPPY ISLAND no ta happy si tur hende no ta happy y kier pone enfasis riba tur hende unda cu e sistema anticua mester keda pa pasado y e futuro mester keda uno positivo.Stap pa Stap e comunidad LGBTQ+ ta haya su luga y cu perseverancia di nos tur cu ta kere riba igualdad lo logra e cambionan necesario. Segun Minister Ursell Arends na Aruba bo mester por ta liber pa biba bo bida sin temor pa discriminacion, abuso of margelisacion.
Segun Minister Ursell Arends Aruba su futuro simplemente no tin espacio pa desigualdad. Pesey mes diabierna anochi ta ilumina e edificio di bestuurskantoor di Pais Aruba na rainbow pa asina mustra e sosten cu ta keda duna na e grupo di LGBTQ+ na Aruba.
