Laga nos tene bon na cuenta cu ora nos ta papia di deseo carnal, nos kier men cosnan cu no ta agrada
Dios, y cosnan cu ta stroba nos comunicacion y nos relacion cu Dios, y pesey mes e ta limita nos
crecemento spiritual.
Galationan 5:16-17 ta para scirbi:Ma mi ta bisa: Cana segun e Spirito y boso lo no cumpli cu deseo di
e carni. Pasobra e carni ta pone su deseo contra e Spirito, y e Spirito contra e carni,pasobra esakinan ta
e contrario na e otro, pa boso no haci e cosnan cu boso kier.
E influencia di e enemigo ta pone hende haci cosnan contra boluntad di Dios, pesey hopi kier biba
manera nan kier y nan no ta respeta ni Palabra ni boluntad di Dios, y esey automaticamente ta pone cu
nan lo no hereda e reino di Dios.
E prins di e mundo aki cual ta e diabel y su sistema kier domina, y como e ta un spiritu y no tin curpa
e ta usa ser humano pa haci cosnan cu no ta cumbini.
Tur hende cu ta compronde esaki ta hala mas serca Dios y ta evita di tur forma di cana bao di
influencia carnal cu ta hiba na pica y rebeldia contra Dios.
Nos ta bibando den un tempo cu rond mundo inmoralidad kier tuma dominio, pesey nos tin di tene bon
cuenta pa nos yuinan y nietonan no wordo contamina, y di berdad si tabatin un tempo cu nos mester
habri nos wowo ta awor.Pasobra den tur cos maldad kier drenta.
Hubentud ta wordo bombardia cu carnalidad tur dia, y tin hende ta duna man na esey sin tene cuenta,
of nan ta hacie pa placa,pasobra e efecto di alcohol, droga, y perversidad riba nos hubentud ta grandi.
E edad pa consumi alcohol bao di nos hubentud a baha considerablemente, y tin muchanan cu bao di
diesdos anja cu ya tin encuentro cu alcohol.
Tin hende ta bebe henter siman, tin hende cu ta bebe weekend so, pero nan weekend ta cuminsa
diabierna mainta bebiendo, y termina dialuna mainta ora mester bay trabao.Y hopi mucha ta mira
locual nan mayornan of hende grandi ta haci y nan tambe ta kere cu esey ta bida.
No stima mundo ni e cosnan cu tin den mundo. Si un hende ta stima mundo, e amor di e Tata no ta den
dje. Pasobra tur loke cu tin den mundo, e deseo di carni,y e deseo di wowo, y e orguyo di bida, no ta
bin di e Tata, sino di e mundo. E mundo ta pasa bay y su deseonan tambe , ma esun cu ta haci boluntad
di Dios ta permanece pa semper.( Juan 2:-16-17).
E obranan di carni cual ta para scirbi den Galationan 5:19-21 ta conta pa tur hende, no pa cierto hende
so, y nan ta indica na nos tur cu ken cu ta participa den nan lo no hereda e reino di Dios. E palabra ta
un spiertamento pa nos tur .
Ademas ora nos ta participa den obranan di carni e palabra di Dios ta siña nos:
*Pasobra e mente fiha riba e carni ta enemistad contra Dios,pasobra e no ta somete su mes na e ley di
Dios,como e no ta capas pa haci esey tampoco.Y esnan cu ta den carni no por agrada Dios.(
Romanonan 8:7-8).
Un ehempel hopi cla di esaki ta: Hende cu ta zundra, murmura,codicia, envidia, y hopi biaha ta mal
agradecido no ta agrada Dios.( Numbernan 14:26-30).
Nos mester biba pa agrada Dios, leu for di deseonan carnal.
Sinceramente, Pastor Marcel Balootje.
