Lider di fraccion Accion 21 Miguel Mansur ta un di e parlamentarionan critico den parlamento pa loke ta trata tratamento di cambionan den presupuesto supletorio di Pais Aruba. Segun Mansur e siglo presupuestario no ta completo si no tin un jaarrekening.
Na varios ocasion minister di finansas ta expresa cu parlamento tin e uitvoering raportage, pero pa parlamentario Miguel Mansur e uitvoeringsrapportage ta un documento politico y un jaarrekening ta keda controla pa Algemene Rekenkamer y un uitvoeringsrapportage no.
Un jaarrekening mester “sluitaan” na e administratie di LandAruba unda cu CAD ta controla esaki , pero un uitvoeringsrapportage no. Segun parlamentario Miguel Mansur directie finansien por manda ki cifra cu nan ta desea CFT y CFT no tin un manera pa comproba e cifranan sino ta via di un jaarrekening. Actualmente LandAruba no tin un jaarrekening desde 2018 , pero minister Maduro a bin gaba riba IMF , pero IMF den su ultimo rapport ta bisa cu Aruba tin problema cu e cuentanan anual.
Fraccion Accion 21 sa cu tin problema debi cu no ta completando cu e siglo presupuestario , pero si kier pa aproba dies un presupuesto supletorio cu ta dificil pa parlamento haci debi cu no tin un jaarrekening. Sinembargo Minister Xiomara Maduro a duna di conoce cu lo e resolve e problema unda cu lo tin un jaarrekening na 2026, ora cu sa cu probablemente e no tey mas como minister, segun parlamentario Miguel Mansur.
E problema cu fraccion Accion 21 tin, ta cu gobierno kier pa parlamento sigui aproba aumento den gasto. Si mester bay bek na e rapport di IMF cu gobierno mes ta indica na IMF nan lo ta hiba un maneho fiscal mas conservativo dus nan lo gasta menos, sinembargo ta wak cu gastonan ta sigui subi.
Tin un record di loke ta bay gasta riba producto y servicio, personal, subsidio, esaki ta e preocupacion primordial di lider di fraccion 21 Miguel Mansur cu e presupuesto supletorio.
Tambe por mira cu esunnan di fundacion no a keda regla, pero ta scucha minister Ursell Arends y Minister Presidente ta bisa cu esey ta debi di e ley di autosubsidio di 2016, sinembargo parlamentario Miguel Mansur ta kere cu esaki ta puro excuus debi cu for di 2016 ta significa cu gobierno tin 7 aña caba den gobernacion y por a cambia e ley.
Aki ta mira cu minister y parlamentarionan si a keda regla cu si ta haya indexering , pero pa esunnan cu ta traha pa stichting no. Segun parlamentario Miguel Mansur esaki ta partinan cu fraccion Accion 21 no por sostene como fraccion.
Tambe por a tende den e bay bin politico minister presidente a bisa cu su partido no ta para pa discriminacion pero nan ta trata tur hende manera nan kier wordo trata, sinembargo siman pasa partido di prome minister a vota contra di igualdad matrimonial , dus personanan LGBT no ta hende den nan bista, segun parlamentario Miguel Mansur.
Ta di lamenta cu ainda Pais Aruba despues di 7 aña di gobernacion di gobierno di MEP , Aruba ainda no tin un proceso presupuestario completo. Loke ta un realidad sin un jaarrekening parlamento no por haci su debido control y pa e motibo aki mes lider di fraccion 21 Miguel Mansur lo vota contra presupuesto supletorio.
