Ta manera nos ta celebrando :”Dia di futbol”, cu e.o andando ketobay dianan di e campeonato
mundial di Europa. E fantástico EK. 2024. Sperando cu pa ora e relato aki wordo publica, cu
ketobay nos team favorito Hulanda lo ta den e finalistanan di e campeonato ketobay. Nos
hulandesnan cu ta gusta fiesta y yena e cayanan na Berlin Alemania tur na e color oranje, cu
nan bailenan di alegria, como apoyo grandi pa nos team Hulanda. Tin biaha Lady Ruth ta hiba
boso dilanti patras , of patras dilanti cu su temanan cubri, pa e motibonan conosi cu ta un bes
pa siman nos ta skirbi. Hulanda su team di profeshonalnan semper ta atrai miles y miles di
fanaticonan cu ta bay stadion den Alemania pa apoya e “Oranjonan”. Transportacion cu avion,
trein, bus of propio auto ta hasi esaki posibel. Tension, lagrima y gritonan di alegria ora nos
team Hulanda ta score gol . Ban wak con lo sigui cu nan. Mientrastanto hopi ta disfruta di e
dushi ambiente na Cafe The Plaza, nos ta bay over un rato riba e “Dia di Mama” cu a wordo
celebra den Centro di Bario y Deporte Dakota den e luna di Mei, cu ya ta trai lomba, pero cu e
curason yen ainda di e bunita celebracion cu tawatatin,cu un dushi fiesta bailabel cu entrada
gratis. Tawatatin bon musica di Robert Maduro y su Azucar, y tambe Gordon’s Disco, un di nos
dushi hendenan di Dakota tur dia, cu semper ta causa furor y impacto cu su repertorio di dushi
musica bailabel. Lady Ruth tawata hopi contento di por a “drop in” un rato den CBDD e anochi
ey, cu lusnan festivo suave, un bar y cushina bon surti y prepara , cu hendenan nechi cu gusta
baila of sinta den grupo of como pareha. Ya dushi musica di Gordon’s Disco tawata sona,
creando asina mas dushi ambiente. Pa motibo di otro compromiso, nos no por a keda fiesta cu
nan, pero, Lady Ruth a saluda y despues a pidi permiso pa nan a sende e lusnan un rato pa
nos por a saca algun potret, debi cu e ambiente romantico tawata domina cu e lusnan di color.
Despues di a saca e potretnan, Lady Ruth a pidi e gentil cabayero Gordon pa a complace cu un
peticion di curason y toca un dushi piesa na ingles, “Dancing Queen” di e grupo ABBA, pa nos
por a los e pianan cu alegria ariba e pista di baile cu ta “un” cu e pareha di Savaneta pero cu
curason festivo semper na fiestanan. Beto y Helene Ruiz, un dushi y bunita pareha cu tey
presente na unda tin bon y dushi musica, ey nan ta, ariba e pista, expresando nan pasion, amor
y alegria den nan movecionnan, asina mes cu nan edad ta un crenchi halto. Fantastico
condicion fisico y den bon balans ! Bailando cu nan pikete dushi asina ! Wel, amigo DJ Gordon
a toca Dancing Queen y varios di esnan presente a subi pista cu nan mesun zjeito y alegria y a
join Ruthy, di Dakota tur dia ariba e pista ! Entre esnan presente den e publico, sinta, ta gosa,
tawata nos bon amigo famia Shon Papa de Wind y su dushi hendenan , Amy y Rudolfo, Mireya
, Shirley y Mavis Rijna, amiganan famia di mi Mama y Wela, kemen mi famia tambe. Y aunke
nos no ta topa otro tur dia, nos ta saluda otro cu hopi carino y alegria. Lady Ruth a ricibi
comentario pa cu su relatonan un crenchi “Bek den tempo” cu nan ta laga nan sinti hopi
contento, pasobra, nos no a lubida nan, nos no a lubida di skirbi un crenchi di varios di e
temanan cu ya ta trai lomba pero cu awor numa ta wordo poni un crenchi den lus di amor. Nan
ta “smile” , pasobra e bunita recuerdonan ta bolbe bin ariba. Despues nos lo bin tambe cu e
bunita celebracion y eleccion di dos bunita Mama di e grupo The voice of Jesus di Modanza
bau liderazco di Vidente Valerie. Ta Dia di Mama tur dia. Esaki ta tur pa awor, sperando cu tur
fanaticonan di e deporte rey futbol lo sigui comporta deportivamente y accepta e teamnan
ganador den e final. Danki pa lesa nos relato y pasa un dushi Dia yen di alegria !
