Donald Mercelina a nase 22 di òktober 1936. El a lanta den Fùik. Su tata ta
e famoso artista plástiko ku yama Hipolito Ocalia. Fuera di artista plástiko
Ocalia tabata músiko tambe. Un tempu lider di e agrupashon musikal yama
“Streider”. Doni su interes den músika ta bini di su tata.
Su promé instrumènt tabata bongo. E tempu ei bongo tabata masha
popular. Tempu ku yunan di Kòrsou a bolbe for di Cuba ku bongo,
marímbula i tres. Fuera di bongo Doni tabata toka kitara i wiri. Mas
despues Doni a toka kaha di orgel i wiri. E tabata tambe gran bailadó di
músika di foklor. E tabata komponé kantika pa bandanan musikal di
kòmbèk.
Un dia Doni komo hóben di 16 aña a mira i skucha e maestro Ta di Djudju
toka barí na Via di Yandi. Esaki a impreshon'é asina tantu ku for di e dia ei
tambú a bira su instrumènt preferí. E promé tambú formal kaminda Doni a
toka tabata hustamente na Via di Yandi,
Ora Doni tabata tin 20 aña el a kuminsá toka ku e labariano mayó di
Kòrsou e legendario Shon Cola i su grupo. Doni a kanta tambe ku Bleko i
su grupo i ku Grupo Trinchera. Doni tabata un maestro den tokamentu, ,
kantamentu i baliamentu di tambú. E tabata gusta kanta kantika weis
largu.
Doni su mérito no ta solamente su tokamentu di tambú pero tambe su
enbolbimentu, konosementu i abilidat pa duna informashon balioso riba
tambú di Kòrsou. E tabata un informante importante ku a duna spikashon
riba historia di tambú, téknika kon ta toka tambú, span tambú, balia tambú i
kanta tambú.
Doni komo kargadó di Kultura ta e persona ku a yuda reskatá algu masha
masha importante: e ritual di áwaseru. E tabata e úniko yu di Kórsou na
bida ku tabata konosé i dominá e téknika kon mester toka e tambú pa
influensia e nubianan pa áwaseru kai. Na vários okashon el a realisá e
ritual aki pa nos. Den museo di tambú por apresiá un foto kaminda Doni
tabata sintá lomba sunú aki den Zjaro Andicuriweg ta interpretá e ritual aki.
Un ritual ku nos avochinan a toka siglo i siglonan pasá pa pone awa kai pa
sigurá kuminda riba nan kunukunan.
E mahestria di Doni ta un kontinuashon di e maestro Estaf Doran yama Ta
di Djudju. Tambú di Kòrsou tin un partikularidat ku ta úniko na mundu. E
spesialismo ta ku un solo persona ta uza su dedenan, su dos plantanan di
man i su rudianan pa saka zonido komo sifuera ta tres tambú ta toka
pareu. Kòrsou su tambú ta un solo tambulero ta toka i saka zonido di tres
tambulero. Esaki ta e kara berdadero di tambú di Kòrsou. Esaki ta e loke
ku ta hasi e barí di Kòrsou di importansia i renombre mundial. Mayoria
kultura ta uza mas ku un tambú pa ehekutá nan tradishonnan musikal.
Kòrsou a uza unu so for di 4 siglo pasá i a sa di mantené esaki te awe. Ta
p'esei tambú di Kòrsou ta meresé di ta riba e lista mundial di herensia
kultural di humanidat di UNESCO.
Ni pastor, ni obispu, ni brigadir ni polis ni niun amtenar ni e mandatarionan
ku ta eksiguí pèrmit pa toka tambú no a logra silensia tambú. Tambú di
Kòrsou nunka a konosé sosiegu. E ta un ekspreshon di resistensia, un
ekspreshon di lucha, un ekspreshon di perseveransia.
Donald Mercelina ta un kargadó di kultura ku a yuda kuida tambú i
mantené bibu bibu. Doni danki pa bo stimashon pa tambú. Danki pa tur
loke bo a siña nos tur.
Awor ku bo a bai ta nos tin ku sigui kuida i promové tambú. Ta nos mester
sòru pa sigui hasi e trabou pa abo por sosegá trankil.
Doni sosegá na pas, tur kos lo keda bon.
Dr. René Rosalia
E palabranan aki ta tresé komo amigu di Doni i na nòmber di Fundashon
Stripan, Grupo Trinchera i Museo di tambú Shon Cola.