Anochi ku luna yen 21 di yüni 2024 na kunuku bella luna, pariba di porta bolivia, serka famia nicolaas i martis ku tema ‘temporada di orkan’

Djabièrne 21 di yüni 2024 tin e evento ‘Anochi Ku Luna Yen’ di 19:00 or – 21:00
or na Kunuku Bella Luna, pariba di porta Bolivia, na kas di famia Nicolaas i Martis. Tema di
e anochi ta ‘Temporada di orkan’
Anochi ku Luna Yen’ ta un evento ku entre otro deklamashon di poesia, kontamentu di
kuenta den lus di luna. E ta un un evento sosial di pueblo i pa pueblo, pues un i tur ta
kordialmente bonbiní. Ta un di e aktividatnan ku Sekshon di Kultura, Arte i Literatura, SKAL,
tin den su agènda kultural.
Hende di Rincon òf Playa ku tin mester di transporte, por hasi uso di un bùs ku ta sali for di
Rincon 18:00 pa buska hende. E bùs akí ta pasa 18:30 na SKAL na Playa pa buska hende i
sali despues rumbo pa Kunuku Bella Luna .Ta pidi tur esnan ku ke hasi uso di e servisio di
bùs, pa reservá na tempu na SKAL òf yama +599 715 5323. Asina nos por sa kuantu hende
mester di transporte.
Manera semper, ta keda liber na kada bishitante pa trese algu di boka dushi pa kompartí ku
otro bishitante. Ta supliká tur hende bini ku nan propio stul. No balotá bo talento i bin
demostrá ku bo por. Nos ta apresiá i respetá tur presentashon pero tin sierto regla sí. Nos no
ta tolerá palabra bulgar, politikeria, atake personal i tur otro kos ku no ta kuadra ku meta di e
evento.
Anochi ku Luna Yen ta un inisiativa ku a nase den pasado for di algun siudadano ku gran
pashon pa nos idioma papiamentu. SKAL ta keda pone énfasis ku meta prinsipal di e evento
ta pa stimulá otro pa skirbi, deklamá, konta kuenta, kanta òf presentá obranan kòrtiku na
papiamentu.