No ta desconoci cu rond mundo tin hopi interes pa conservacion di lama. Den e parti aki Aruba tambe ta pone atencion. Asina Sietske van der Wal ta Conservation Education Manager, Marine Park Manager na Aruba Conservation Foundation a duna di conoce.
Loke ta un realidad cu mundo a laga e mundo maritimo un banda manera un clechi cama blauw cu no sa kico ta pasa bou di dje. E interes pa e lama y kico ta sosode bou di e lama awo ta birando mas y mas grandi y cu esey ta bin mas y mas informacion y awo ta mira con severo e situacion bou di lama ta.
E impacto humano riba nos lama ta hopi grandi, no ta trata solamente riba e impacto directo ora di drenta lama of ora nos haci actividadnan den lama, pero tambe e impacto indirecto manera e cambio di clima, pero na mes momento e polucion cu ta keda crea riba tera cu ta caba den lama. Tin hopi diferente manera cu nos como serhumano tin un impacto grandi riba lama sin cu nos mes ta consciente di dje.
Un persona no mester drenta lama pa tin un impacto riba lama y door di esaki nos lama a sufri hopi caba, esaki ta conta pa Aruba pero mundialmente tambe. Segun Sietske van der Wal pa e motibonan aki mes ta importante pa no pensa solamente pa proteha loke cu tin pero mester inclui restauracion y rehabilitacion. Unabes cu tin e biodiversidad e sistema ta bira hopi mas resiliente pa cualkier otro impacto cu bini door cu cambio climatico Aruba por sobrevivi esey.
Nos como hende ta depende di nos lama, sea si bo ta drenta lama si of no, si bo ta como pisca si of no e serhumano ta haci diferencia y ta depende di lama. Nos mester ta hopi mas consciente di e parti aki. Hasta awasero ta depende di nos lama, e temperatura cu nos ta sinti ta depende di lama. Porehempel den e ultimo dianan por sinti e temperatura na Aruba y esaki ta señalnan cu tin indicacion cu algo no ta canando bon y algo ta cambiando. Aunke hopi di nos no ta realisando un parti di nos lama ta cambiando.
Sietske van der Wal Conservation Education Manager, Marine Park Manager na Aruba Conservation Foundation ta kere cu ta importante pa nos ta consciente y ta importante pa realisa cu berdad nos tur ta sinti e calor inmenso cu tin ultimo dianan y nos tur ta pidi pa un bon awasero debi cu e awasero lo yuda pa tin un poco mas fresco y e lo yuda nos matanan y tur e naturalesa rond di nos pero tambe nos mes un hardin di cas cu na mes momento lo scapa nos di e consumo di awa y coriente cu nos ta uza.
Sinembargo nos no ta para keto y puntra nos mes di unda e awasero ta bin, e awasero ta bin di lama cu a vapora bay halto y na momento cu e ta fria bek e ta baha como awa. Pa ta mas facil si mester mira e proceso di WEB , por bisa cu ta e mes un proceso ta wordo haci , pero simplemente e proceso di awasero ta un proceso di naturalesa.
Loke ta un realidad si e lama di Aruba no ta saludabel tin hopi polucion aden nos awa di bebe tampoco ta saludabel. Si nos no tin awa saludabel no por produci awa pa comunidad y hende no por biba sin awa.
Conservacion di bida maritimo no ta algo solamente di Aruba , pero dia pa dia mas y mas e ta wordo reconoci como un prioridad hopi grandi mundialmente y den region Caribe y pa e motibo aki mes tin diferente gruponan importante rond mundo cu ta bini hunto pa asina papia y duna otro sosten di e problema nan maritimo cu tin pa hunto yega na solucionnan pa e bida maritimo.
