Den sala di archivo Nacional Aruba a tuma luga un anochi di informacion. Manera nos tur sa Archivo Nacional Aruba a cuminsa traha riba e website www.coleccion.aw y cu awe tin un cantidad grandi di informacion riba dje. Riba e anochi di informacion por a mira un sala completamente yen unda cu ta mustra cu a pueblo di Aruba tin interes den nos historia. E tarea di e anochi ta pa mustra con e sistema ta traha y tambe laga mas hende sa cu tin diferente partnernan ta traha riba diferente herencia cultural pa duna comunidad di Aruba informacion.
Tin un total di 11 partnernan cu ta pone nan informacionnan tambe banda di e informacionnan di Archivo Nacional. E persona cu ta haci investigacion por haya tur loke e ta busca riba un solo website cu ta coleccion.aw . Pesey mes ta importante pa yuda esunnan cu no sa ainda con pa busca informacionnan riba e website pa nan presenta na tipo di charlanan asina pa por splica y sa mas detaya con e website ta hinca den otro pa asina por tin acceso mas facil na informacionnan cu ta busca.
Director di Archivo Nacional Raymond Hernandez ta sumamente orguyoso di full e team di Archivo nacional cu ta traha riba tur loke awe e comunidad por gosa di dje. E trabou ta wordo haci cu hopi dedicacion y amor pa por archiva mas tanto cu ta posibel pa e pueblo di Aruba tin acceso y tin mas conocemento di historia di Aruba y nos antepasadonan.
Loke ta un realidad ta cu si no haci un bon trabou di inventarisacion e material cu mester keda digitalisa no ta wordo bon digitalisa cu por trece consecuencia. Pero e team cu tin actualmente aunke cu e ta chikito tin hopi animo pa archiva y duna pueblo di Aruba mas acceso cu ta posibel.
Banda di e website Raymond Hernandez Director di Archivo Nacional Aruba ta haci un apelacion di comunidad di Aruba si tin documentonan y of articulonan bieu, no benta nan afo , pero trece nan archivo nacional y lo busca den nan y lo benta loke no ta necesario afo y wanta loke cu por bay den historia.
Actualmente Archivo nacional ta ricibi hopi informacion di gobierno di ambtenaarnan cu a traha nan rapportnan y ta skirbi nan cartanan, pero tambe tin e tempo colonial cu ta hopi biaha for di e punto di bista Europeo cu ta di e hendenan cu ta den funcion ta ricibi. Sinembargo ta importante tambe por ricibi informacionnan cu ta na cas di hende por yuda yena unda e bashinan ta y asina por compronde historia hopi mas miho di diferente angulo. Pesey mes prome cu benta documentonan afo of articulonan afo pasa laga nan na Archivo nacional y lo por mira kico ta di importancia pa Archivo Nacional wanta y pone den historia di Aruba.
