Plataforma PAIS a delibera cu camara di comercio riba e vision di un ley BEL beneficio economico laboral

Mester bin un cambio grandi pa por haya un reforma completo.
Miembro di Plataforma Pais, Otmar Oduber, durante reunion cu Camara di Comercio a presenta nan plan pa bin cu un ley BEL (Beneficio Economico Laboral). Esaki ta encera cu negoshinan cu tin un ganashi, un porcentahe di esaki mester bay bek pa e empleado. Es decir, un porcentahe limita di e ganashi ta bay como beneficio adicional pa e trahador. Esaki pasobra durante ultimo 40 añanan tur hende ta gaba cu nos economia ta bay hopi bon, cu turismo ta subi y caha di gobierno a bira gordo gordo, pero contrario na esaki, e trahador a perde, pasobra mientras caha di gobierno a bira gordo, nan a haya medida den nan curpa.
Durante e conversacion a bin dilanti cu aproximadamente 14-15 medida contra pueblo a wordo introduci, no solamente haciendo e pueblo mas pober, pero haciendo e productonan mas caro tambe.
Pesey Otmar ta contento cu e recepcion cu tabatin pa cu e plan di BEL cerca Camara di Comercio. Normalmente ora bin cu plannan asina ta bay cerca sindicatonan solamente pasobra ta algo cu ta beneficia e empleadonan, pero Plataforma Pais a considera importante pa scucha representantenan di comercio tambe. “Nan tabata hopi habri pa e idea, hopi pregunta a bin di nan banda, hopi comentario a bin di mi banda tambe pa por a discuti e punto aki. Mi ta kere nos ta riba e bon caminda, siguientemente nos lo tin encuentro cu Comerciantenan Uni pa scucha nan opinion. Tambe lo reuni cu sindicatonan, ta spera cu pa otro siman por reuni cu nan y asina e ideanan aki por cuminsa wordo materialisa”.
Plataforma Pais ta presentando propuestanan concreto, ya caba a bin dilanti cu 4: 1. Mester bin cu prioridad cambionan di ley cu ta trece beneficio pa nos pensionadonan, nan calidad di bida, nan salud y mas du tur nan stabikidad economico (despues di esaki por a scucha tur otro partido papia riba pensionadonan); 2. Mester reduci gastonan di gobierno cu por lo menos 10-12%, esaki riba un presupuesto cu ta riba 1.6 billion florin na e momentonan aki y 3. Mester introduci e reforma fiscal riba cual ta papiando pa 25 aña caba, no por sigui cu BBO cu ta haci tur producto na Aruba demasiado caro y mas bien bay den direccion di BTW; 4. Mester bin cu un asina jama ley BEL pa e empleado por goza di un porcentahe di e ganashi di e compania pa cual e ta trahando y asina e por tin mas placa den su saco y tambe ta crea eficiciencia y mas productividad na pia di trabao.
Te na e momentonan aki ta solamente Plataforma Pais a bin cu proposicionnan concreto, no a tende MEP, AVP, Raiz, Accion 21, MAS of otronan independiente bisa kico concretamente nan ta para pe. “Nos ta bise awe pa comunidad cuminsa pensa den e direccion ey, pasobra nos kier pa e siguiente eleccion definitivamente bin un cambio grandi na e pais aki. A yega momento pa un cambio grandi tuma lugar na Aruba pa nos por haya un reforma completo di nos pais atraves di proposicionnan nobo cu ta wordo lansa y carga door di e comunidad aki”, ta palabranan di miembro di Plataforma Pais, Otmar Oduber.