Aruba Bank Walk & Run a culmina dia 23 di mei unda e comunidad a bini hunto pa cana y core durante 4 dia largo den diferente districto di nos isla. Cu un total di 2500 persona cu a compromete di acumula mas di 20 kilometer durante e 4 dianan.
Despues di un evento asina exitoso y sosten masal di nos comunidad, Aruba Bank kier a haci un gesto y duna parti di e pago di registracion di e participantenan di Walk & Run na un fundacion cu tin mester di nos ayudo, Stichting Bethel Nieuw Begin.
Stichting Bethel ta un cas cu ta fungi como hogar pa personanan den rehabilitacion of problema di adiccion. E residentenan ta wordo atendi, scucha, y guia como parti di nos comunidad.
Diahuebs atardi Roxanne Croes y Nelleke Cardenas, di e team di mercadeo di Aruba Bank a bishita Stichting Bethel pa asina haci e donacion aki oficialmente.
Sra. Irene Gomes, directora di Stichting Bethel tawata sumamente emociona cu e bunita gesto aki y ta contento di por a ricibi un sosten financiero inespera y cu a scoge pa pone atencion na personanan cu menos privilegio den nos comunidad.
Aruba Bank a demostra atravez di e donacion aki cu nan ta reconoce e importancia di e trabao di Stichting Bethel y ta contento di por sostene nan esfuerzo pa duna sosten na tur esnan cu tin mester.
