Kòrsou a keda sakudí djabièrnè anochi ku otro kaso di asesinato. Ta trata di un funshonario
públiko den e kadena hudisial, un Marechaussee. Partido MAN-PIN ta konsiderá e kaso aki
un atentado kontra nos seguridat nashonal. “Aki a kursa un liña delikado den nos sistema
hudisial”, kolaboradó di frakshon di MAN, Eugene Cleopa ta bisa.
MAN-PIN ta mashá di akuerdo ku kuerpo polisial di Kòrsou a bin dilanti i duna informashon
despues di e suseso. Pero, nos ta haña sumamente lamentabel ku gobièrnu, lesa aki
minister di Hustisia, sr. Shalten Hato ku polítikamente ta responsabel pa e kadena hudisial,
no a asumí su responsabilidat debidamente te ku awe, sigur no den e forma responsabel ku
ta spera ku un minister serio ta atendé ku tipo di kasonan asin’aki.
Den komunidat tin indikashon/informashon ku gobièrnu a pidi Merka i Hulanda yudansa
den e investigashon andando i ta importante pa minister di Hustisia klarifiká e informashon
aki. “Ta importante pa minister trankilisá komunidat, i garantisá seguridat di nos
komunidat”.
MAN/PIN ta keda señalá ku ora ta trata di situashonnan serio den pais, no ta haña niun
minister di gabinete Pisas pa duna kara i tuma su responsabilidat. Gobièrnu no ta tene un
konferensia di prensa kaminda prensa por hasi nan trabou, i asina duna informashon pa
komunidat.
“Ta manera ku na Kòrsou nos NO tin minister di Hustisia. Tin masha hopi kos robes i
kastigabel ta pasa den nos komunidat mientras minister ta hasi spetakel riba media sosial,
Ta hunga komedia riba ‘tiktok’ i lubidá ku su responsabilidat ta pa garantisá seguridat di nos
pais.
Komo ku minister di Hustisia, Hato no ta duna kara riba e suseso lamentabel aki, partido
MAN-PIN ta tuma nota di vários notisia ku ta saliendo den medio di komunikashon. Esta, ku
minister Hulandes di Defensa a papia ku minister Hato na algun okashon, ku ekspertonan
polisial/hudisial a bin òf ta biniendo Kòrsou pa traha riba e investigashon i ku Aruba kier
manda yudansa Kòrsou èts. èts.
“Pero informashon di minister Hato mes, nada. Òf minister Hato no tin kòntròl riba e
situashon? Pa evitá káos òf bruashon den akshonnan ku ta tumando lugá, minister Hato
mester duna kara”, MAN/PIN ta terminá bisando.
Ki ora minister Hato ta duna kara?
