E di 21 Evento di Liderasgo Femenino for di 2004 na Kòrsou: ‘Female Leaders Volunteering’, tabata atrobe un éksito.
E evento a tuma lugá djabièrnè último i kuminsadó di e konferensia Victoria Wild a presentá un invokashon skibí pa konsehero di e konferensia sùr Dr. Norma Angel, deseando partisipantenan pa selebrá huntu den harmonia éksito di e gran muhénan presente ku sosten di hòmbernan presente, pa huntu yega un meta komun.
Apertura ofisial di e konferensia tabata na enkargo di gezaghèber di Sint Eustatius, Alida Francis kende a papia di su tanta Christine Flanders. E lider bon konosí den su komunidat no a hasi trabou boluntario pasobra e tabata buska fama, ni rekonosementu òf fortuna. El a duna di su mes pasobra e ta kere den kompartí bendishonnan ku el a haña di Dios.
‘Tambe nos no ta duna den nos sosiedat antisipando pa haña algu bèk. Nos no ta boluntario pa haña mihó trabou ni pa por pone riba nos CV. Nos ta hasié estriktamente pa amor. Nos ta hasié ku kompashon i responsabilidat sosial’.
Inisiadó i organisadó Reyna Joe a splika vishon di e konferesnianan for di 2004. Enfasis mester keda riba hende muhé ku a studia, ku a hasi karera i ku ta topa retonan ku ta oportunidat pa sigui krese òf ku por tin resultado negativo tambe.
Mar Introini na Madrid, Spaña ku pashon a papia di ‘Ora altruismo topa profeshonalismo’. Su pashon ta ku e grupo universal G100 pa logra ku hende muhénan rònt mundu ta uni i sirbi otro.
Bwalya Mwali na Antwerpen, Belgika a pone énfasis riba e kaminda di empoderamentu i ret di kontakto. El a papia di proyektonan aktivo pa laga hende komprondé i benefisiá di trabou di boluntario.
Oonagh Justina di Kòrsou a papia di ta boluntario pa bo mes ku bon outoestima i imágen di bo kurpa. El a pone atenshon riba importansia di tin un bon imágen di bo mes i pa den tur kos keda kòrda pa duna bo mes atenshon manera lo bo hasi siendo boluntario pa un otro hende.
Jacqueline Kwidama di Kòrsou a papia tokante di brasamentu di loke ta imposibel i servisio na humanidat poniendo énfasis riba ku ni maske kiko pasa, ku mester usa retonan pa kontinuá krese miéntras ku bo ta sirbi bo komunidat.
E evento aki a haña energia na kuminsamentu i na final di movedó Monielle Hous ku a trese i wanta un energia vibrante empoderante entre partisipantenan.
Organisadónan ta agradesido pa kada sosten risibí pa por a realisá e evento empoderante aki. Nan ta konvensí ku e eksperensia aki atrobe a motivá algun tremendo hende muhé pa bai pa loke ta mihó pa nan miéntras ku nan ta sirbi nan komunidat.
