Partido MAN (Movementu Alsa Nashon) djasabra 1 di yüni 2024 a tene su di
36 kongreso statutario. Segun statuto di Partido MAN kada 2 aña mester tene un kongreso.
Durante di e kongreso a trata diferente punto básiko di un kongreso i puntonan di aktualidat
i interes general ku ta biba bou di nos komunidat. Durante e kongreso tambe a duna
aprobashon “decharge” na e directiva i tesorero saliente riba kuentanan anual di 2022 i
2023.
Un di e aspektonan ku tabata ‘highlight’ di e kongreso tabata elekshon di un direktiva nobo.
E direktiva nobo durante e próksimo 2 aña lo mester sigui duna kontinuidat na vishon i
maneho di e partido. Di un forma demokrátiko a skohe e miembronan di direktiva.
E lider di partido konforme statutonan ta un miembro di direktiva. Sr. Kenneth Gijsbertha a
keda elegí komo presidente, seguidamente sra. Lidushka Cijntje-Carolie komo vise-
presidente, sr. Yaël Plet komo sekretario general i sra. Florence Tomsjansen-Fernan komo
tesorero.
Banda di e funshonnan ariba menshoná tambe a eligí 5 miembro ku a postulá pa e
funshonnan di komisario. E komisarionan elegí ta sra. Giana Murray-Anasagasti, sr. Curtley
Perez, sr. Farley Lourens, sr. Angel Alvarez i sr. Jowenny Troeman. Presidente saliente, sra.
Irelnety Copra a gradisí direktiva saliente pa nan trabou i miembronan pa e sosten.
Seguidamente presidente nobo a hiba palabra na miembronan di Partido MAN.
Sr. Gijsbertha a indiká ku komo presidente nobo di Partido MAN e lo hasi su máksimo
esfuerso pa sigui dirigí partido basá riba dignidat humano, hustisia sosial, inklushon, bon
komunikashon, rèspèt mutuo i transparensia.
Kongreso a ratifiká e aprobashon di Konseho di Partido pa e akuerdo di kolaborashon entre
Partido MAN i Partido PIN. Presidente di Partido MAN a indiká ku nos tin un meta komo
partido pa elekshon 2025, pa medio di un lista kombiná duna Kòrsou bèk un polítika di nivel
i un representashon den parlamento i gobernashon ku realmente ta sali na defensa di nos
país, nos pueblo, su nesesidatnan i kuida nos estado di derecho.