No ta importa con dramatico un situacion por ta, no ta importa con dificil of duro e situacion por ta, no
ta importa ken ta para of kico ta para den caminda , oracion haci na Dios den nomber di Cristo Hesus,
ta cambia e situacion, y trece e bendicion.
Hesus a bisa cu si nos tin fe manera un simia di moster, nos por bisa e sero kita y cay den laman y esey
lo sosode.(Marco 11;23.)
Hesus a haci oracion pa su mes, pasobra Hesus tabata haci hopi oracion, pa demostra na nos awendia
cu oracion ta necesario den nos bida, nos cas y nos famia.
Hesus a haci oracion pa su mes. ( Juan 17:1-5).
Hesus a haci oracion pa su disipelnan. ( Juan 17:6-26).
Hesus a haci oracion pa su enemigonan. ( Lucas 23:34).
Den Filipensenan 4:6 e palabra di Dios ta siña nos pa no preocupa pa nada,ma den tur cos pa medio di
oracion, y suplica cu gradicimento, laga boso peticion ta conoci dilanti di Dios.
Nos oracion ta comunica nos cu Dios, oracion haci cu Fe tin poder, pasobra fe ta move mannan di
Dios, oracion ta un mandato di Dios, pa nos yega na su trono di gracia y ricibi pronto auxilio y ayudo
na tempo,( 2 Cronicanan 7:14).
Mateo 18:19 Hesus ta duna nos garantia y seguridad pa nos oracion bisando: Atrobe mi ta bisa boso,
cu si riba tera dos di boso bay di acuerdo tocante cualkier cos cu nan pidi, esaki ta wordo haci door di
mi Tata cu ta den cielo. Pasobra caminda dos of tres ta reuni den Mi nomber ey Mi ta mey mey di nan.
Manera mundo ta bayendo, e enemigo di nos alma , ta trece tur tipo di distraicion, pa kita nos atencion
for di oracion, y hopi hende ta pone nan fe den material, hopi hende ta pone fe den idolatria, y hasta
den bruheria, pero no tin nada mas poderoso ora un hende pone su fe den nos Señor Cristo Hesus cu ta
sinta na man drechi di e Tata.
Baibel ta siña nos cu tur rey y tur mandatario cu a haci oracion pa nan pais y pa nan pueblo tabatin
exito, hasta den e situacion di mas dificil cu por a sosode, y hopi di nan a mira milager, y tambe mira
con Dios ta sali na nan defensa.
Placa no por reemplasa oracion, oracion tabata tey prome cu placa, placa ta un instrumento, oracion ta
nifica confiansa y fe den Dios Topoderoso.
Daniel a haci oracion, y Dios a manda un Angel den cueba di leon cu tabata seya cu un baranca, pa
sera boca di e leonnan. Esey ta pa tur hende por sa , cu no ta importa na unda bo ta , ni tampoco bo
situacion, oracion ta pone Dios yega na bo alcanse y librabo for e situacion di mas dificil cu por tin.
Saintiago 5:16 ta siña nos cu e oracion di e husto por hopi.
Pablo tabata recorda Timoteo riba oracion.
Pa medio di oracion, salomon a ricibi sabiduria serca Dios, pa e por a goberna e pais.
Pa medio di oracion Pedro a wordo libra for di prison.
Pa medio di oracion y alabansa Pablo Y Silas a wordo libra for di cadena y saca for di prison.
Pa medio di oracion Elias a baha candela for di cielo.
Pa medio di oracion Pedro a lanta Dorcas for di morto.( Hechonan 9:40-41).
Tur locual bo mester di Dios, pone bo mes den Su boluntad y pidi.
Sinceramente, Pastor Marcel Balootje.
