Konseho Sosial Ekonómiko (SER), awe a risibí un seshon informativo detayá di e
peritonan ku ta traha riba e konsepto di regulashon nashonal pa merkado di kuido. E seshon informativo aki a keda presentá pa representantenan di Ofisina di Telekomunikashon i Post (BT&P) i Direktorado di Legislashon i Asuntunan Hurídiko (WJZ) di gobièrnu. E konsepto di e regulashon akí a ser someté na opinion di SER.
E konsepto di regulashon nashonal pa merkado di kuido tin komo meta pa supervisá i regulá e merkado di
kuido, seguro médiko, legalidat i efisiensia di entrega di kuido i atenshon médiko. Durante e seshon
informativo, e personanan ku a traha riba e konsepto di e regulashon a pone énfasis riba e nesesidat di e
regulashon aki pa un mihó maneho di gastunan den sektor di kuido i logra un sistema di kuido di salú mas
efisiente.
BT lo tin un tarea supervisivo. Esaki ta nifiká ku BT&P, komo entidat atministrativo independiente ku eksperensia den regulashon di preis i kalidat, lo ta responsabel pa supervisá merkado, desaroyo di merkado, i regulashon di tarifa i aktuashon den sektor di kuido. Ta konsiderá e regulashon akí esensial pa prevení komersio no regulá entre provedornan di kuido i seguronan médiko, pa evitá ku esaki lo por kondusí na desafionan sosial indeseabel.
Un punto krítiko riba kua a enfatisá durante e seshon informativo ta nesesidat pa e tèrmino- i proseduranan
den e regulashon di konsepto ta kla i por ser ehekutá pa prevení mal entendimentu entre e partidonan envolbí. BT lo tin un ròl importante pa sigurá un sistema transparente i hustu ku ta protehá e interesnan di tur stakeholder den e sektor di kuido.
SER ta balorá e splikashon detayá i transparente di e proseso. E konseho ya a inisiá un repaso kuidadoso di e konsepto di e regulashon. Basá riba e repaso aki, huntu ku e informashon adishonal optené durante e seshon informativo, SER lo formulá un opinion konsultativo. Den e proseso aki, SER lo tuma na konsiderashon e interesnan di tur stakeholder envolví i lo enfoká pa un regulashon di merkado balansá i hustu for di un punto di bista sosioekonómiko ku ta benefisiá henter komunidat.
