Partido MPB ta hopi desepshoná relashoná ku e karta di Sekretario di Estado di dia 7 di mei
2024, den kua e promé kambio di presupuesto di 2024 a keda firmemente rechasá. Ta un
bòftá den kara di gobernashon di Boneiru ku e promé kambio di presupuesto no a sigui niun
di e rekomendashonnan di Cft i al final ta keda rechasá di parti di Sekretario di Estado. Esaki
ta algu hopi inusual.
Diputado Abraham ta malinformá Konseho Insular
Durante un reunion di Konseho Insular miembronan a hasi pregunta tokante e
rekomendashonnan ku CFT a sugerí i na e momento ei diputado Abraham a malinformá nan
bisando ku e kambio di presupuesto akí no tin nada grandi aden i ku ta trata di solamente
kambionan tékniko. Esaki no ta bèrdat. Tin montantenan astronómiko di sèn den e
presupuesto hinká, riba 5 mion dòler, sin ku tin niun splikashon pa kiko ta bai usa e sèn.
Esaki ta totalmente kontra reglanan di bon gobernashon i transparensia. Pa e motibu akí
tambe e Sekretario di Estado a rechasá e promé kambio di presupuesto.
Hefe di Finansa i konsehero ta entregá retiru
Banda di esaki e hefe di Finansa i tambe su konsehero prinsipal di Finansa a entregá retiru for
di gobièrnu te ku nos por a tuma nota di un vakatura pa un hefe di Finansa nobo. Nos tin
entendí ku ta e manera di funshoná di e diputado di Finansa a pone ku nan a disidí di no por
sigui mas den e gobièrnu akí, kaminda tur kos ta kambia bira káos. Esaki ta trese kuné ku
mas ainda kosnan ta bai sigui pega den gobernashon.
Pregunta na diputado di finansa
Partido MPB awor ta eksigí kontestanan kla for di Kolegio Ehekutivo di Boneiru i ta pidi pa
tuma akshon urgente pa atendé ku nos finansa na un manera serio i hasi e kambio di
presupuesto konforme lei i regulashon. Ku e meta ku finalmente e medionan finansiero lo por
keda poné disponibel pa por hasi e kosnan ku e pueblo akí meresé.
MPB -PAP Karta vragen afkeuren 1e begrotingswijziging en 1e UR 2024 PapTu