Cu regularidad seccion Warenkeuring en Hygiëne (DWH) di
Departamento di Salud Publico ta haci su controlan di hygiëna y certificado di salud
riba supermarket y den sector di “food and beverage”. Esaki pa garantisa alimento di
calidad y tambe proteha comunidad di malesanan transmiti di hende pa hende pa
medio di alimento. Esaki ta e motibo pakico tur persona cu ta traha cu alimento y
bebida mester tin un certificado di salud valido na momento di DWH su personal
pasa pa controla.
Pa sector di “food and beverage” e exigencia aki no ta nada nobo. DVG ta informa
cu esnan cu no cumpli cu ley y permiti empleado maneobra cu alimento pa
consumidor sin un certificado di salud valido lo por confronta un situacion hopi
fastioso ora DWH pasa haci control. E chens ta grandi cu e establecimento por
wordo cera y no por habri bek tanten cu no tin empleado cu certificado di salud
valido pa haci e trabou. Si e control di DWH tuma lugar ariba un diabierna y
encontra cu e trahadornan no tin nan certificado di salud na ordo, e establecimento
por pasa henter weekend cera.
Pa evita cu DWH mester cera negoshinan, DVG ta recorda tur supermarket y sector
di “food and beverage” pa cumpli cu tur regla di higiena y e leynan manera e.o. esun
cu ta prescribi cu tur persona cu ta bende cuminda y/of bebida mester tin nan
certificado di salud na ordo. No warda te ora DWH yega den bo establecimento pa
controla pa core manda empleadonan bay saca nan certificado di salud. Pa aplica of
renoba un certificado di salud tin un proseso pa encamina di cual tin
aproximadamente 10 dia di trabou prome cu e keda cla. Pa evita un situacion no
desea ora personal di DWH presenta pa haci nan inspeccion, ban cumpli cu ley.
DVG ta recorda sector di horeca cu controlnan riba aspecto di hygiëna ta continua.
