Aruba Tourism Authority (A.T.A.) ta orguyoso di a presenta su prome sesion “Eco-Conscious” den
colaboracion cu Aruba Conservation Foudnation (ACF), antes conoci como Fundacion Parke nacional
Aruba (FPNA). E sesion a wordo presenta pa Marisol Sanchez – Communications Manager di A.T.A.,
Derchlien Dijkhoff – Senior Product Specialist di A.T.A., Stephanie Casanova SVP Consumer
Communications di Agencia Internacional Zeno Group, Tyson Lopez – CEO di ACF, Natasha Silva – Chief
Conservation Officer di ACF, y Edeline Berg – Communications & Marketing Manager di ACF.
A.T.A. y ACF ta reconoce e importancia den conscientisa socionan local riba e aspecto di ta consciente di
e impacto cu nos cada un tin riba nos isla y asina con por traha hunto den e direccion di un turismo
responsabel y sostenibel. Pa logra esaki, A.T.A. ta implementando un enfoke di comunicacion cu lo
envolve e comunidad local, educacion, compromiso, y participacion, cu e meta pa hunto, como
organisacion, comunidad y socionan por bay den e direccion corecto.
Un aspecto critico cu a wordo resalta ta e importancia di conserva y proteha nos naturalesa,
particularmente reconociendo e biodiversidad unico cu nos isla tin.
E prome sesion a conta cu presentacion di tendencianan global, manera e movimento di 'Slow Travel
Tourism' cu ta e tipo di bishitante cu ta tuma e tempo pa descubri e lugar cu e ta bishita. Alabes, e
movimento di 'Positive Impact Tourism' cu ta enfatisa y ta enfoca pa no impacta e pais di bishita
negativamente.
Durante e sesion, a comparti idea y concepto di comunicacion cu por wordo adopta cu ta relata na topico
aki. A pone tambe enfasis na e manera con por ahusta y mehora e metodo di comunicacion y contenido,
manteniendo e proposito di e compania cu ta bende un producto of servicio na e bishitante. Ta di
menciona cu pronto A.T.A. lo reactiva e programa ‘Aruba Promise’ cu ta para pa norma y conducta di
tanto e bishitante como e local, formando un circulo di informacion. Tur esaki ta pa agrega mas na e
direccion di un turismo cu menos impacto.
Cu mira pa futuro, A.T.A. ta comprometi pa continua traha riba un turismo cu ta balansa prosperidad
economico cu cuido na nos medio ambiente, y bienestar di nos localnan.
A.T.A. ta gradici tur socio cu a forma parti di e prome sesion y lo continua cu e siguiente sesion den algun
siman.
Tocante Aruba Tourism Authority (A.T.A.)
Desde 1 di januari 2011, Aruba Tourism Authority ta opera como un entidad ‘Sui Generis’ (SG), un
organisacion independiente den e esfera publico. Aruba Tourism Authority ta fungi como ‘Destination
Marketing and Management Organization (DMMO) y ta responsabel pa uni interes turistico entre socionan
local y internacional.
Si compara aña 2023 cu 2011 ora a lansa A.T.A. SG, por nota cu Tourism Receipts a subi cu 94%, e
cantidad di turista cu ta yega Aruba a aumenta cu 43%, RevPAR a aumenta cu 82% mientras cu turismo
crucero a crece cu 36%. Den cantidad absoluto, na aña 2011, Aruba tabata conta cu 822 mil turista pa
aña, mientras cu na 2023 a alcansa 1.2 miyon turista pa aña, via aeropuerto. E cifranan aki ta subraya e
forza di e destino y demanda pa cu esaki desde cu a funda A.T.A. SG. E contribucion total di biahe y
turismo na GDP di Aruba lo alcansa 74% pa aña 2023.
A.T.A. ta pone hopi enfasis riba e e modelo di “High Value-Low Impact” cu ta para pa un balans entre
aumenta e balor economico di e bishitante, posiciona Aruba como un pais desea y sostenibel y posiciona
Aruba como lider den desaroyo como un destinacion. Cu meta pa sigui mantene esfuersonan den linea
segun e balans menciona y logra aumenta entrada pa medio di calidad di turismo en bes di e volumen cu
nos destinacion ta ricibi. Capacidad di carga ta sigui ricibi atencion di parti di A.T.A.
