Shonnan tur, un bon dia yen di sabiduria den nos alegria ! Nos relato di awe ta cu un toke tristo, cu e perdida di dos amiga, kendenan a bay nos dilanti den e Reino Celestial. Nos tur sa, of mayoria di nos sa y ta accepta cu nos tur tin cu laga e mundo fisico y material aki un dia, tardi of tempran. Nos niun sa ki dia y ki ora. Tin biaha e ta bin como un sorpresa doloroso Nos a tuma despedida di Gladys, e bunita bisinya di Lady Ruth, Gladys Celaire Toppenberg y algun dia despues tambe Olivia Figaroa cu tawata pa hopi anja e cara y curason briyante di Biblioteca Nacional, semper cu su bunita sonrisa cu tambe a wordo yama pa bay sosega den brasa tierno di su Creador di amor.. Nos corazon ta tristo, cu lagrima, pero cu gradicimento pa tur cos cu nan a nifica y hasi pa nan sernan stima y pa Aruba. Nos ta comparti dos poema den e mesun relato.
PA MI BON BISINYA
Tawata mire regularmente ta cana pasa bandi nos cas
Tin biaha merdia, tin biaha atardi ora solo ta bahando
Cu su bunita sonrisa den su caluroso saludos
Cu rollers den su cabei cuidando su mes
E ta puntra con ta cu mi mayornan
Den un combersacion cortiko, ami contestando
Mi bon y bunita bisinya Gladys
Ela dunami permiso pa laga nos palo grandi di mispel
colga den su cura, pa un crenchi sombra y frescura
Lamentablemente su bida akibao cu no a dura
Awe nos ta despedi di su curpa cu no por a carga su peso di sufrimento mas
Cu gradicimento den nos oracion, pa e sosega na pas
Cu Tata Dios dunele un bunita lugar den su Reino celestial
Gladys, keto, trankil, bunita, suave pero balente den su maneranan unico y special
Forsa di consuelo y amor na su yui , casa, rumannan y demas famia
Y cu den shelo serca su angelnan Gladys sigui briya
Mi “lieve buurvrouw” , Gladys Celaire Toppenberg ,sosega na pas
Den Tata Dios su cas.
Danki pa tur locual bo a duna y hasi pa bo hendenan stima
Bo a inspira y stima nan cu henter bo ser,
Mi bunita y dushi amiga bisinya, drumi dushi numa…..
Ta Dios tin tur e poder.
Acrosticamente nos a inspira riba e nomber di Olivia
O livia Figaroa, un hende muhe professional original unico cu no tin su igual
L iber den su ser, expresa di su curazon, su sonrisa y hari dushi y special
I nespera nos a lesa riba facebook, cu Olivia ya no tey mas cu nos fisicamente
V ictorioso y amoroso awor den brasa di su Creador di amor den lus eternamente
I awor pa semper mas serca di nos mente, alma y curason
Aruba a perde un baluarte, y su unico prins Agni a perde su bunita mama, pé nos oracion.
Hopi forsa, consuelo y amor na famianan, amigonan, ex-coleganan, bisinyanan y tur cu a conose e dos hende muhenan aki. Lady Ruth ta gradicido di a conose y duna nan oido y atencion na bida.Nos a sinya hopi di tur dos. Nos lo sigui tuma bida Öne day at a time”. Lieve Gladys y Olivia, como streanan angelnan wardador boso lo sigui shine ! Na nos fiel lectornan , danki pa lesa nos relato. Y pa tambe recorda e dos sernam special aki den boso oracion.
Un bearhug di Lady Ruth.
