Den un esfuerso colaborativo dirigi pa promove diversidad y inclusion den
comunidad, Centro pa Desaroyo Aruba (CEDE) – BARiO UNICO den colaboracion cu Pan American
Development Foundation (PADF) a lansa un serie di sesionnan di training enfoca riba diversidad y
inclusion. E iniciativa aki cu ta posibel danki na e colaboracion entre CEDE y PADF, tin como meta
capacita organisacionnan no gubernamental (NGO) y fundacionnan cu conocemento y habilidadnan
esencial den e tereno di diversidad y inclusion. Danki na e sosten financiero di Gobierno Mericano,
por a realisa e series di trainingnan aki.
E serie di sesionnan di training a cuminsa diahuebs, 25 di april, cu un enfoke riba ‘Cultural
Sensitivity’. Un total di 27 participante di 15 diferente organisacion a atende e prome sesion di
training, cu e deseo pa mehora nan comprension y habilidadnan con pa promove un organisacion y
comunidad mas inclusivo.
Nos kier extende nos gratitud sincero na Yolanda Richardson y Deborah Alexander pa a facilita e
prome training tocante diversidad y inclusion. E sesion di training a cuminsa cu un reflexion tocante
aceptacion individual di diversidad, sigui den discusionnan riba inclusividad organisacional y con por
adapta polisanan y maneho existente pa inclui tur cliente of empleadonan.
Adicionalmente, nos kier a gradici Universidad di Aruba, demonstrando nan compromiso pa avanza
educacion di inclusividad na Aruba.
Durante e proyecto, participantenan lo tuma parti di cuatro diferente sesionnan di trainingnan
cubriendo un variedad di temanan manera proteccion y mecanismonan di proteccion, educacion:
oportunidadnan di educacion pa migrantenan y kico ta e desafionan riba e tereno aki, y por ultimo lo
finalisa e sessionan di trainingnan cu monitor y evaluacion den maneho di proyecto.
BARiO UNICO, ta e team organisatorio pa e series di trainingnan aki, ta facilita conexionnan entre
organisacionnan riba e isla y facilitadornan cu experticio riba nan tereno, promoviendo un ambiente
di desaroyo y colaboracion.
