Na scol nos tawata traha, pinta algo bunita pa Dia di Mama, tempo nos tawata un mucha.
Hib’ele cas scondi pa Mama no wak e, te e dia mes di Dia di Mama. Na hubentud nos tawata
kere cu nos tawata sa tur cos nos mes. Nos amigonan tawata mas importante. Despues na grandi,
cu nos mes ta Mama ( y Wela tambe) , mas y mas nos ta realisa su balor durante henter su bida.
Awe nos Mama ta meymey di nos ainda, Danki Dios, cocochando un crenchi cu su salud, pero su
presencia, su bos y su holor ta impacta nos tur dia di nobo regala na nos . Dios ta bon. Dios
semper ta bon. Dia cu Lady Ruth a bira Mama su mes ( 1978) di su prome yiu homber, Rene,
(Lady Ruth ta bendiciona cu 2 yiu homber, Rene y Jean ) a realisa con importante ta e rol di
Mama, e sabiduria den cada dia pa cumpli cu su responsabilidadnan cu amor, cu pasenshi, cu
pasion pa e criaturanan inocente asina bunita forma pa Dios. For di e dia ey tambe ela cuminsa
y sigui trata su Mama cu mas respet, cu mas amor, duna mas atencion. Nos a sali bay bebe koffie
hunto, tin biaha bay hunga Bingo, y bay wak Mama hunga domino den su team cu a yega di bira
campeon, dal un cerves bon friuw . Nos a bay come den diferente restaurant, su favorito
Driftwood pa su fillet di pisca fresco cu su saus crioyo y su pan bati. Nos a bay riba diferente
barconan crusero hunto, hunto cu mi casa Johan y Papa. Varios bes algun di mi rumannan
tawata join nos den nos viahenan ariba barco crusero. Esun mas gusta pa Mamanan tawata
Carnival cruise ship. Mama a bishita su famianan na Hulanda varios ves. E cu papa a bay
Canada pa bruid di su ruman muhe Irena, ( awe dfm). Si Lady Ruth a cumpra un tas cora p’e
mes, e tawata cumpra un pa su bunita y dushi Mama tambe. Mama ta un so tin. Y no tin dos
igual. Cada famia cu nan mesun experiencia y historia pa cu nan Mama. Awe Lady Ruth ta para
keto un rato den su pensamentonan, cu masha hopi gradicimento na curason pa su Mama : “P.
Mercedes Bergen-Tromp cu a celebra na luna di November 2023 ultimo su di 70 anja casa
felismente cu e unico amor eterno di su bida :”Lucas L. Bergen cu tawatatin Mercedes como su
unico amor grandi eterno y reina den su bida, aunke varios mama di yiu muhenan di otro
barionan tawata purba di mete y stroba e relacion poderoso di amor aki entre Lucas y Mercedes
den e dushi bario Dakota. Locual Dios uni, niun otro man no por separa. Y ta e ehempel
impactante aki ta e ehempel tambe pa ami, Ruthy “Lady Ruth” cu mi casa Johan Vrieswijk, na
caminda e anja aki na December pa nos di 47 anja casa felismente. ( cu su ups and downs,
manera tur pareha, pero waaaaw ! ( What an awesome journey together !).
Lady Ruth a inspira algo pa su dushi y bunita Mama, e biaha aki pa Dia di Mama Mei 2024.
AMOR DI MI MAMA
Mi Mama ta stima su 4 yiunan : Roy, Ro, Lucky y ami Ruthy, ta duna di su mes tur dia
Mi Mama ta stima su casa, nos tata, cu a comparti cu n’e te awor 70 anja di olanan yen di alegria
Mama ta sacrifica su tempo den tempo tristo of contento, duna bon conseho
Mama ta hunga domino y bingo, Mama ta cushina e cumindanan crioyo di mas dushi
Mi Mama no a malcria su mes ni cu joyas ni cu luho, excepto scoge e auto nobo cada dos tres
anja, cu e tawata desea di core, el a prefera di yuda su famia di 12 ruman
Su curason inspira cu sintimentonan puro, unda cu tawatatin mester ela duna un man
Hasi oracion pa proteccion y guia pa nos, su yiunan, canta den cushina mientras ta cushina
Mama cu hopi amor y hopi fe, awe cu su salud den su mes baile di bai bin bai bin den mente
Awe nos ta reflecciona riba anjanan di su bon bida y bendicionnan riba dje drama
Nos ta rondon’e cu bon cuido, atencion y amor, cu nos mesun fe y amor awor mas frecuente
Nos tin nos Mama meymey di nos ketobay den 2024 cu su 88 anja di edad
Su presencia, su bos, su holor, ta muestra di e gran amor di Dios den dje cu bondad
Su Hesus, su lus, su guia y inspiracion den cada atencion cu dedicacion
Nos ta demonstr’e y bise tur dia cu nos ta stim’e, nos ta duna Dios danki p’e
Y den nos humilde oracion ta pidi Tata Dios pa sigui cuid’e y proteh’e
Te dia Dios tum’e, segun Su boluntad na shelo como na tera
Pa mi Mama, pa nos Mama, pa tur Mamanan un dushi Diadomingo nos ta spera
No laga pa mayan locual bo por hasi awe, y no ta necesariamente e regalonan na material
Tratele bon cu respet, bisele danki, bisele bo ta stim’e, Mama ta unico y special
Bishita bo grandinan tur dia, y si por, hiba nan come, keiro cu nan, brasanan, papia cu nan
Nos tur ta spera di por biba pa hopi tempo, y manera e palabranan di un sabio ta bisa
“Sea semper contento !”
Un felis Dia di Mama bendiciona na tur cu ta Mama.
Un “bearhug” di Lady Ruth pa boso tur !
