For di 7 te ku 10 di mei próksimo, Konseho Sosial Ekonómiko (SER) di Kòrsou lo partisipá riba nivel tékniko den un konferensia iberoamerikano na Cartagena de Indias, Colombia, komo presidente di e ret regional CESISALC (Red de Consejos Económicos y Sociales e Instituciones Similares de América Latina y el Caribe). Bou di e título ‘Encuentro: Democracia, pactos y consensos: la contribución de los Consejos Económicos y Sociales a las políticas públicas para una mejor gobernabilidad democrática. Sostenibilidad y cambio climático’, e enkuentro lo enfoká riba e ròl esensial di konsehonan konsultativo sosioekonómiko den promové maneho públiko efektivo pa mehorá gobernashon demokrátiko.
E seremonia di apertura lo ser hasí pa ofisialnan distinguí di e konseho sosial ekonómiko di Spaña i e Sentro Spañó di Formashon pa Koperashon di Desaroyo na Cartagena, ku ta ko-organisadónan di e konferensia. Durante e konferensia, e partisipantenan lo elaborá riba vários tema krusial, manera e impakto di diálogo sosial institushonalisá riba maneho gubernamental, desafioi oportunidatnan ku sostenibilidat i kambio di klima ta trese. Tambe lo tin un enfoke riba e ròl di inteligensia artifisial den desaroyá modelonan regional inkluyente y sostenibel.
Oradónan eminente for di vários pais di nos region lo kompartí nan perspektiva riba kon konsehonan konsultativo sosioekonómiko ta forma un fundeshi pa fortifiká prosesonan demokrátiko pa medio di diálogo konstruktivo i koperashon. E kontribushonnan aki ta suprayá e funshon esensial di e konsehonan aki den atendé dinámika regional i e kompleksidat kresiente dje desafionan global.
SER di Kòrsou ta enfatisá e importansia di koperashon internashonal kontinuo i interkambio di konosementu pa atendé desafionan komun. E konferensia aki ta brinda un plataforma pa eksplorá solushonnan di maneho ku ta sostenibel i ku por benefisiá gobernashon i prosperidat di sosiedatnan den Latinoamérika i Karibe.
SER Kòrsou ta presidí reunion di ret regional di SER-nan na Colombia
