Un dushi publico grandi, den un sala yen, a presencia y goza di un bunita anochi na Biblioteca
Nacional den Madurostraat recientemente. E focus tawata riba 3 cabayero di cual 2 ya no tey cu
nos mas fisicamente y 1 cu si ta bibito bibito ainda cu su elegante y bunita snor y barba blanco
sinishi y ketobay dunando tur locual e por di su tempo y capacidad profeshonal como lenguista
na nos dushi idioma Papiamento. Nos ta referi na Ramon Todd Dandare. Mario Dijkhoff y
Pedro Velasquez (awor den felis memoria) a wordo representa pa miembronan di famia cu a
comparti cosnan interesante y bunita di e bida di nan sernan keri, cu tambe a duna di alma y
curpa na e desaroyo di nos Papiamento. Nan a skirbi buki -, diccionario -, storia – y dichonan pa
nos futuro generacionnan no lubida di unda nos ta bin. Tawata un bunita anochi di Dedicacion y
Recuerdo dedica na e tres docentenan aki di e curso di Papiamento di anjanan 2001/2002.
Tawatatin un charla duna pa Gregor Dijkhoff, un presentacion di Sergio Velasquez , Linda
Richardson y algun corector di Papiamento e.o. Nilda Koolman cu a toca e curasonnan cu su
poemanan nechi presenta, principalmente esun di “Poempoeloenchi”. Pabien na Fundacion
Corector di Papiamento cu e exitoso anochi aki, cu sigur a laga tur hende bay cas mas inspira cu
mas amor pa nos Papiamento. Publico por a admira tambe den e sala na banda, un bunita
exposicion :”The trip of my life” di Corina di Suiza cu a nace cu “Cerebral Palsy”. Su cuadranan
simpel, colorido y inspirativo. E benta di su cuadranan ta bay pa e fundacion :” Addopt an
Addict”. Drs. Linda Richardson a nace na Aruba y ta biba na St. Maarten. E ta autor di un buki
interesante tocante e.o. leynan cu jueznan tin cu mantene nan mes na nan, y e.o. kico ta sosode
den Corte di Husticia. E maestra di ceremonia, e simpatico Suzy Maduro a guia e anochi
sublimemente, e tambe a sigui e curso duna pa Mario, Pedro y Ramon. Remarkabel pa Lady
Ruth, tawata, e presencia di e gentil cabayero Ernesto Rosenstand Jr. yiu homber di Ernesto
Rosenstand (awe tambe dfm). Ernesto grandi tambe a duna curso di Papiamento hopi anja pasa
na un grupo di periodista – y journalistanan hunto cu e inolvidabel dynamico, arubiano original y
unico ,Gregorio “Ito” Tromp. Lady Ruth tawata den e grupo ey den anjanan 80/90 !? Hopi anja
pasa si ! Ernesto Rosenstand Sr. tawata e motor tras di Lady Ruth pa publica buki cu a bira
despues bukinan. Su criticanana constructivo a yuda. El a kere den mi, mas cu mi tawata kere
den mi mes. Mi ta corda e di e.o. :” Tin hopi cosnan bunita y bon den nan “esta mi Poemanan y
mi relatonan. Djey tambe Lady Ruth su prome buki a nace titula :” Mi bida den un dia” y “Den
silencio”. Ernesto Rosenstand cu e.o. su buki “E sonyo di Wawa”.(2006) y “Wawa den mondi”.
Y e storianan di indjan di mas bunita cu ta existi, e.o. di “Guadirikiri”, “Casibari”etc den e buki
“Cuentanan Rubiano”. Mi tin e buki ey den mi coleccion di bukinan na Papiamento.
Ernesto, un shon di hende cu a skirbi e.o. e poemanan di mas bunita pa su sra.esposa Mabel,(
awe tambe dfm). Nos a bay cas cu na curason e fantastico declamacion di un poema super pero
super bunita mes, presenta y actua cu tremendo accentuacion fuerte y bon articulacion di Sra.
Julie Franken Thode, un di e corectornan incansabel ya trahando como voluntario den esaki pa
anjas .Titulo di e poema ta :”E rebelde” di autor escritor Mario Dijkhoff (dfm). Fantastico !
Ki bunita presentacion di mi sis Julie ! “Awesome” ! Nos ta conclui nos relato cu, un bunita
poema, hopi simpel alaves profundo, berdad, di alma y curason, skirbi pa mi bunita sister-friend
Verna Beaujon. Un poema cu lo papia cu bo curason tambe. Danki pa e atencion di awe. Un
“bearhug” grandi diki gordo di Lady Ruth pa tur nos dushi y fiel lectornan di “Sabiduria den nos
alegria”.
“ARUBIANO MI TA”
M’a nace di bariga di un Mama
cu no ta Arubiano, pero
ami si ta, paso mi Tata ta
Orguyoso di ta multi lenguahe
Na cas ingles, na scol hulandes
Y cu friends papiamento o spanjo
Ningun problema di expresa mi mes
Nada di miedo na scol hulandes
paso mi ta sigur di mi mes
Como Arubiano nos ta admira pa
por comunica den 4 idioma
Esey mester ta nos prome orguyo
Y no laga descriminacion
ni negativismo domina nos biba
Si, Papiamento ta importante
pero no dominante
Tur e otro idiomanan cu nos sa
ta duna nos caracter enorme
Un isla asina chikito den Caribe
cu hende asina educa y avansa
Autor : Verna Beaujon
Aruba, 2024
