Frakshon di MFK ta felisitá MinPres Gilmar Pisas i MinFin Javier Silvania pa
konhuntamente ku Sint Maarten, a yega na solushon dje problema di ENNIA, kual sigur ta yuda
krea mas konfiansa den sektor finansiero/ekonómiko di nos país.
Manera ta konosí, for di dia 8 di yüli 2018 ENNIA tabata bou di supervishon di Banko Sentral. E
kompania di seguro ENNIA tabata den un debakel finasiero, kual tabata pone ku 30 mil
asegurado, di kual 25 mil na Kòrsou i alrededor di 5 mil na Sint Maarten, nan penshun tabata
kore peliger di baha ku kasi 80% na balor.
Gabinete Pisas II na 2021 a heredá e debakel finansiero di ENNIA, kual e gobièrnunan di turno
anterior, NIUN no a buska posibel alternativa te pa nan por a logra yega na un solushon dje
problema.
E problema finansiero di ENNIA tabata di tal índole, ku Ulanda a mara solushon dje problema
aki, na e interes ku Kòrsou mester paga den e areglo pa re-finanshamentu dje fiansa di 911 mion
florin durante COVID.
Pero Minister di Finansa Javier Silvania, huntu ku un tim di eksperto finansiero i e kuerpo di
ámtenar dje ministerio di finansa a sabi di sinta huntu ku entre otro Banko Sentral,
representantenan di ENNIA i finalmente Promé Minister i Minister di Finansa di Sint Maarten,
p’asina por a yega na un solushon struktural pa e debakel finansiero na ENNIA.
Promé Minister Gilmar Pisas huntu ku Minister di Finansa Javier Silvania, Promé Minister Silveria
Jacobs di Sint Maarten, representantenan di CBCS i representantenan di ENNIA, siman pasá a
firma e akuerdo, despues ku Ulanda i CFT tambe tabata di akuerdo i a aprobá e solushon na kual
a yega finalmente.
Frakshon di MFK pa e motibu aki kier felisitá Gabinete Pisas II, pero prinsipalmente Minister di
Finansa Javier Silvania, pasó ku e akuerdo firmá esaki lo nifiká na mes momento ku e interes ku
Kòrsou mester paga riba re-finanshamentu dje fiansa di 911 mion florin, ta baha di 5.4% pa 3.6%
lokual lo nifiká un redukshon di alrededor di 1.5 mion florin na interes pa luna, o sea un
redukshon di 18 mion florin na interes pa aña.
Ku e solushon aki, tur e 30 mil klientenan di ENNIA nan kurason por ta trankil, pasó e akuerdo
aki lo duna garantia di pago di nan penshun próksimamente.
E solushon aki alabes ta sigui krea mas konfiansa den e sektor finansiero/ekonómiko di país, ku
konsekuensha ku ekonomia di Kòrsou lo por sigui registrá kresementu den 2024, manera
pronostiká kaba dor di Banko Sentral.
Frakshon di MFK ta desea hopi forsa i sabiduria na Gabinete Pisas II, pa
kontinuá ku e trabounan di manera ku pueblo di Kòrsou por sigui tuma nota
di e esfuerso realisá na bienestar di tur siudadano dje país aki.