Miembro di frakshon di MFK, Ramón Yung ta kere ku teniendo kuenta ku e
multiple problema i situashonnan ku ta surgiendo tur dia di nobo riba e merkado
finansiero/bankario i ekonómiko, a bira tempu pa gobièrnu studia e posibilidat pa kombertí Giro
Settlement Holding den un Banko Nashonal.
Pa basta tempu kaba por skucha gritunan di preokupashon ku ta bin for di diferente gremio den
komunidat pa loke ta e problemanan ku nan ta konfrontá kuné, na momento ku nan mester
atendé nan asuntunan finansiero.
For di dia ku GIRO a dal su portanan sera, un kantidat di siudadano ta konfrontando problema
pa por habri un kuenta bankario di manera ku nan por risibí nan pago di penshun. Den kaso ku
un penshonado no ta dispone di un kuenta bankario, momento ku SVB manda e plaka banko, e
siudadano mester paga un suma di 10 florin ku 60 sèn pa e por disponé di su plaka di penshun.
Banda di e grupo di penshonado aki, kobradónan di “ònderstant” tambe ta konfrontá basta
desgusto na momento ku nan mester kambia nan karchi di banko, komokiera ku e karchi ta
registrá bou di SOAW.
Fuera di penshonado i siudadanonan ku ta risibí sosten sosial, tin otro siudadanonan ku tampoko
No por logra habri un kuenta na banko, sin ainda para ketu na e grupo grandi di stranheronan ku
ta trahando di forma no legal, ku tampoko NO ta disponé di un kuenta bankario, ku tur e
konsekuensha ku esaki ta trese kuné.
Pa kolmo bankonan resientemente a hasi kambio dje plataforma pa medio di kual nan ta hasi
transakshonnan di pago via “tap” òf “swaip”. Esaki tabatin komo konsekuensha ku
komersiantenan awor mester paga un “fee” mas haltu pa kada transakshon ku nan realisá.
Anteriormente e komersiante tabata paga un “fee” di 0.15% riba kada transakshon, pero ku e
plataforma nobo, a oumentá esaki na 0.5%
Konsekuentemente e oumento aki lo pone ku komersiantenan ta bai oumentá preis di nan
produkto i òf servisio, lokual na su turno lo baha e forsa di kompra dje siudadano, mientras ku ya
nos ta papiando di un inflashon haltu.
Fuera di tur e gruponan ariba menshoná, tin e sektor di riferonan ku pa motibu di “Compliance”
di parti di “correspondent bank” ku e bankonan lokal ta traha ku nan, NO por logra habri un
kuenta bankario.
Tur e aspektonan aki ta trese kuné ku gobièrnu NO tin un bista amplio riba e sektor finansiero i
sirkulashon di plaka den nos país.
Mientrastantu Giro Settlement Holding ya a adelantá i pa e aña aki lo paga mas ku 70% dje fiansa
di 170 mion florin bèk na Ulanda. Pa tal motibu, lo ta bale la pena pa gobièrnu studia e posibilidat
pa kambia e statutonan di GSH ku a keda fundá pa sirbi solamente komo un “incassobureau”
(Special purpose vehicle) i kombertí esaki den un Banko Nashonal.
Esaki lo trese solushon pa tur e problema di siudadano i negoshinan ku no ta
disponé di un kuenta bankario. Gobièrnu na mes momento lo haña un mihó
bista riba e sistema monetario, o sea sirkulashon di plaka den nos país.
Teniendo kuenta ku e kantidat di siudadano penshoná, esnan ku ta haña sosten sosial
(ònderstant), studiantenan. riferonan i otronan ku ainda no tin un kuenta di banko, tur e
problemanan aki lo pasa pa istoria.
Esnan menos pudiente, pero negoshinan chikí, mediano i tambe grandi lo tin oportunidat pa por
logra yega na micro-fiansa, di manera ku nan tambe por konosé desaroyo.
Alabes, enbes ku bankonan komersial ta hasi ganashi i ta manda nan plakanan di ganashi den
eksterior, tur ganashi realisá ku un Banko Nashonal lo keda Kòrsou mes.
