Instituto Hulandes pa Siguridat Públiko (Nederlandse Instituut voor Publieke Veiligheid (NIPV) awe ta transferí tres pòmp mobil di emergensia i nan baki ku slan pertenesiente, na Brantwer di Marina. Dentro di poko tempu nan lo bai pa Kòrsou i Aruba. E sistema di kònteinernan HCP aki ta intenshoná pa kazèrnenan di Marina riba e islanan. Pero Brantwer lokal tambe por hasi uso di nan na momentu di inundashon. Brantwer di Marina i NIPV awe a firma e akuerdo di transferensha.
E pòmpnan mobil di emergensia por keda usá den un situashon di emergensia (eminente), durante e temporada di orkan, por ehèmpel na momentu di un inundashon. E pòmpnan ta adekuá pa pòmp saka gran kantidat di awa.
“Riba islanan di Karibe nan no tin e sistemanan aki”, Komandante en Hefe Athunto di Kuerpo di Brantwer di Marina, Twan Langenhuizen, ta bisa. “Esei tambe ta e motibu ku instruktornan di nos tambe ta bai ku nan. Nan lo bai instruí Brantwer lokal di ki forma nan mester ópera e pòmpnan. Pa medio di e kolaborashon aki nos lo tin einan tantu medionan komo personanan ku por usa e sistemanan.”
Na Hulanda tambe Brantwer di Marina ta traha estrechadamente ku Brantwer Sivil. Por ehèmpel durante kordinashon di kalamidatnan i kandelanan den e parti ariba di Noord-Holland.
Pantaya kontra zeta i skuma kontra kandela
Sigun Langenhuizen e pòmpnan ta un parti di un pakete mas grandi di rekursonan ku ta bai islanan di Karibe Hulandes. Pensa riba pantayanan kontra zeta i skuma kontra kandela. Pa medio di koperashon ku e kuerponan di brantwer riba e islanan, nos por protehé e kazèrnenan mihó sin ku mester manda personal einan.”
Instituto di Konosementu
NIPV ta e Instituto di konosementu pa gestion di krísis i servisio di brantwer. E organisashon ta fortalesé regionnan di seguridat, Reino i otro sosionan di krísis ku investigashon, edukashon, informashon i apoyo.
