Estimado direktiva di Algemeen Pensioenfonds Curaçao,
Ku hopi preokupashon nos ta sigui e desaroyonan resien den e área di Jan Thiel, pegá na e awanan interior di Caracasbaai. Ta kobando seru i saka tera pa traha un proyekto yamá ‘Laman’ (Facebook: Laman Curacao), ku ta konsistí di apartmentonan di luho, i ta kap di palu di mangel ku ta forma un parti esensial di nos ekosistema, lokual ta un akshon preokupante ku ta menasá e ekilibrio natural i biodiversidat di nos isla.
Nos ta konsiente ku e area ei, manera stipulá den EOP, ta area destiná pa desaroyo turístiko, i ta sostené desaroyo. Sinembargo esaki no ta kita responsabilidat pa sòru pa un desaroyo balansá. Sigur di un fondo di penshun di nos ambtenarnan nos ta spera un vishon di desaroyo amplio na bienestar di henter e komunidat.
Komo siudadano preokupá di Kòrsou, ku ta pone su mes na servisio di futuro di nos isla, nos ta hasi un yamada fuerte na direktiva i gerente di e fondo di penshun APC, pa tuma un papel di guia den desaroyo responsabel di nos teritorio. Esaki ta nifiká ku proyektonan di desaroyo mester ta den konformidat ku e Plan di Desaroyo Insular (EOP), tratadonan internashonal ku Kòrsou a ratifiká, manera e protokòl SPAW (‘Protocol concerning Specially Protected Areas and Wildlife to the Convention for the Protection and Development of the Marine Environment of the Wider Caribbean Region’), i e obhetivonan más amplio di kambio di klima i durabilidat ankra den ‘sostainable development goals’ di Nashonnan Uní, SDG’s, manera APC mes ta indiká de e diferente notisianan disponible riba boso wèpsait.
Komo un kuadro strategiko por sirbí nos EOP ku ta ofresé, banda di ordenashon di nos teritorio den areanan di bibienda, turismo, industria, èts, prinsipionan ku ta krusial pa konservashon di nos balornan monumental, balornan natural, nos paisagenan i balornan tangibel i intangibel kultural.
Tambe e protokòl SPAW, ku ta konta pa Kòrsou i ta pa brinda protekshon na áreanan marino espesial i bida salváhe, por sirbi komo prinsipio ya ku por medio di dje ta resaltá e importansia pa konservá nos ekosistemanan kostero úniko. Den lus di kambio di klima, awor mas ku nunka ta importante pa praktiká métodonan duradero ku ta protehá nos rekursonan natural i ta fortifiká e resilensia di nos isla.
Además, konstrukshon di kasnan sosial mester ta un aspekto importante di desaroyo duradero i sostenibel. E ta ofresé e oportunidat pa krea komunidatnan inklusivo kaminda tur siudadano, sin importá nan klase, kolo òf entrada, tin akseso na bibienda di kalidat i pagabel.
Desaroyanan ku nos ta tuma nota di dje na Jan Thiel/ Caracasbaai i Brakapòti (Facebook: APC Real Estate & Investment – Brakkeput Noord), kaminda ta subastá terreno na esun ku por ofresé mas sèn), no ta inklusivo pa mayoria di nos pueblo ya ku ta esnan pudiente, hopi biaha ekstranhero, so por bin na remarké pa e terenonan apartamentonan di luho konserní. E desaroyonan na Kaminda Brudernan di Brakapòti, kaminda a kap hopi mata i tin hopi desagué, tambe a trese hopi preokupashon.
Nos ta komprondé ku APC mester hasi rendimentu pa e fondo ta salú, na mes momento nos ta konvesí ku APC komo persona huridiko públiko, lanta por medio di un lei di nos pais, esta ‘Landsverordening Algemeen Pensioenfonds’, por bira un ehèmpèl den desaroyo balansá i duradero riba nos isla.
Nos ke pidi APC pa den su maneho tene kuenta ku e siguiente prinsipionan:
- Desaroyo Duradero i Sostenibel: Invertí den proyektonan ku ta praktiká métodonan di konstrukshon duradero i sostenibel i ku ta minimalisá e impakto ekolóhiko i ta usa energía di bientu, solo of awa.
- Protekshon di Ekosistemanan: Protehá e palunan di mangel, seru, awanan, kosta, sistemanan di desague i otro ekosistemanan vulnerabel komo parti di bo plan di desaroyo.
- Protekshon di Monumento i Sitionan Históriko i/o Kultural: Inklui i konservá monumentonan i sitionan históriko den e plannan di desaroyo.
- Responsabilidat Sosial: Integrá proyektonan di kasnan sosial ku ta kontribuí na inklushon di nos pueblo i prosperidat pa henter nos komunidat i envolví habitantenandi bario den formulashon di e proyekto
- Transparensia: Komuniká habri tokante bo plan di desaroyo i su impakto riba e medio ambiente i sosiedat.
- Komuniká bon ku gobièrnu riba infrastruktura di karetera ya ku tantu Caracasbaaiweg komo St. Rosaweg ta sumamente kongestiona kaba ku trafiko.
Dor di sigui e prinsipionan aki, Algemeen Pensioenfonds Curaçao por sirbí komo un ehèmpel pa desaroyo duradero i demonstrá ku rendimentu finansiero por bai huntu ku e bienestar di nos planeta i su habitantenan, e asina kumplí ku e prinsipionan di “people, prosperity, planet, peace, and partnership’.
